“Tolibon” 15-avgust kuni Afg‘onistonni deyarli to‘liq egalladi. Kobul aeroporti esa AQSh harbiylari nazorati ostida, ular NATOning boshqa mamlakatlaridan kelgan harbiylar yordamida aeroportda evakuatsiya ishlarini amalga oshirmoqda.
“Tolibon” vakillari chet el fuqarolari va mamlakatni tark etmoqchi bo‘lgan afg‘onistonliklarning ketishiga to‘sqinlik qilmaslikka va’da bergan. Ammo ommaviy axborot vositalari xabariga ko‘ra, aeroportga borishga urinayotgan odamlar katta qiyinchiliklarga duch kelmoqda, chunki u yerga olib boradigan barcha yo‘nalishlar “Tolibon” blokpostlari tomonidan nazorat qilinadi. Bundan tashqari “Tolibon” 31-avgustdan keyin odamlarni evakuatsiya qilishni taqiqlamoqchi. Afg‘onistonda evakuatsiya ishlari qanday ketayotgani haqida “Kommersant” fotoreportaj tayyorladi.
Afg‘onistondan nafaqat AQSh va NATO mamlakatlari fuqarolari, shuningdek, “Tolibon”ga qarshi kurashda G‘arbga yordam bergan afg‘onistonliklar ham evakuatsiya qilinmoqda. “Tolibon” ta’qibidan qo‘rqqan minglab afg‘onlar uchib ketishni xohlaydi, 16-avgust kuni ertalab ular reyslardan birortasiga o‘tirish uchun uchish maydoniga bostirib kirgan va yerda turgan samolyotlarga osilib chiqishga harakat qilgan. Hodisa oqibatida 7 kishi halok bo‘lgan.
17-avgust kuni AQSh harbiy-havo kuchlariga tegishli C-17 Globemaster III harbiy transport samolyotida Kobul aeroportidan 640 ga yaqin afg‘onistonlik evakuatsiya qilindi. Dastlab shuncha odamni bortga olib chiqish rejalashtirilmagan edi, biroq afg‘on guruhlari uchish maydoniga bostirib kirib, samolyotga o‘zlari chiqib olgan. Shundan so‘ng ekipaj ularni kuch bilan tushirib yubormaslikka, aksincha bortdagi hammani olib uchishga qaror qilgan.
Avvalroq AQSh prezidenti Jo Bayden avgust oyining o‘rtalaridan beri 28 ming, iyuldan beri 33 ming odam evakuatsiya qilinganini aytgandi, shu bilan birga, evakuatsiya tezlashgan: so‘nggi 36 soat ichida 11 ming kishi evakuatsiya qilingan.
“Tolibon” 31-avgustni AQSh qo‘shinlarining Afg‘onistondan olib ketilishi uchun so‘nggi muddat deb belgiladi. Shuningdek, AQSh va Buyuk Britaniyaga evakuatsiya uchun qo‘shimcha vaqt berilmaydi. Ta’kidlanishicha, agar xorijiy kontingent belgilangan sanaga qadar mamlakatni tark etmasa, u holda harakat tarafidan javob ko‘rsatiladi.
CNN ma’lum qilishicha, AQSh hukumati Kobul aeroportiga kirishni cheklashga qaror qildi. Aeroportga faqat AQSh va NATO mamlakatlari fuqarolari, shuningdek, grin-karta egalari kirishi mumkin. Nomzodlarni filtrlashda endi “Tolibon” yordam beradi.
Shuningdek, “Tolibon” ham Afg‘oniston fuqarolarini Kobul aeroportiga kiritmay qo‘ydi, endi faqat chet elliklar uchib ketishi mumkin.
Mavzuga doir: Germaniyaning ikkinchi evakuatsiya samolyoti 125 nafar yo‘lovchi bilan Afg‘onistondan Toshkentga uchib keldi
Izoh (0)