AQSh va Buyuk Britaniyaga evakuatsiya uchun qo‘shimcha vaqt berilmaydi. Bu haqda “Tolibon” vakili Suhayl Shohin ma’lum qildi. Uning ta’kidlashicha, “Tolibon” ushbu mamlakatlarning qurolli kuchlarini Afg‘onistondan olib chiqish muddati uzaytirilishiga rozi bo‘lmaydi. Agar xorijiy kontingent belgilangan sanaga qadar mamlakatni tark etmasa, u holda harakat tarafidan javob ko‘rsatiladi.
Foto: Yandex
“Bu qizil chiziq. Prezident Bayden 31-avgustgacha barcha harbiy kuchlarini olib chiqib ketishini e’lon qilgan. Shuning uchun ularning Afg‘onistonda qolishi cho‘zilsa, bu ular zarurat bo‘lmasa ham o‘z istilosini kengaytirayotganini anglatadi”, — dedi Shohin Sky News telekanaliga bergan intervyusida.
Jangarilar vakilining aytishicha, evakuatsiya jarayonini uzoq davom ettirish “mamlakatlar o‘rtasida ishonchsizlikni keltirib chiqaradi”. “Agar ular o‘z istilosini davom ettirish niyatida bo‘lsa, bu reaksiyaga sabab bo‘ladi”, — deya qo‘shimcha qildi Suhayl Shohin.
Avvalroq AQSh prezidenti Jo Bayden avgust oyining o‘rtalaridan beri 28 ming, iyuldan beri 33 ming odam evakuatsiya qilinganini aytgandi, shu bilan birga, evakuatsiya tezlashgan: so‘nggi 36 soat ichida 11 ming kishi evakuatsiya qilingan.
“Tolibon” hokimiyatni egallab olganidan keyin ko‘plab mamlakatlar Afg‘onistondan evakuatsiya qilish ishlarini olib bormoqda. Shu sababli tartibsizlik va tiqilinch yuzaga kelgan, oqibatda Kobul aeroporti va uning atrofida kamida 20 kishi halok bo‘ldi. Jo Baydenning ta’kidlashicha, afg‘onlarni evakuatsiya qilish tarixdagi eng katta havo ko‘prigi hosil qildi. “Tolibon”ning aytishicha, afg‘onlar qo‘rqqanidan emas, balki G‘arb mamlakatlariga ko‘chib o‘tishni istaganidan qochmoqda.
Avvalroq Kobul aeroporti yaqin ikki kunga yopilishi, bu allaqachon uning hududida bo‘lib turgan odamlarni evakuatsiya qilish uchun kerakligi ma’lum qilingan edi. Shuningdek, “Tolibon” jangarilari Kobul aeroportidagi evakuatsiya jarayoniga aralashishga uringan taqdirda, AQSh ularga tezda javob qaytarishi haqida ogohlantirgan edi.
“Tolibon” Kobul aeroportidagi evakuatsiya ishlariga aralashmaslikka va’da bergan. Ammo amerikaliklar va ularning ittifoqchilari bilan hamkorlik qilgan afg‘onistonliklar “Tolibon” ularning ketishiga to‘sqinlik qilishidan qo‘rqmoqda.
The New York Times xabariga ko‘ra, “Tolibon” so‘roq qilish va jazolash uchun AQSh harbiylari bilan hamkorlik qilgan afg‘onlarni qidira boshlagan. NYT ta’kidlashicha, “Tolibon” ro‘yxatdagi odamlarni, jumladan, Kobul aeroporti yaqinidan ham qidirmoqda, aeroport hozir mamlakatni tark etish mumkin bo‘lgan yagona joy.
