«Толибон» 15 август куни Афғонистонни деярли тўлиқ эгаллади. Кобул аэропорти эса АҚШ ҳарбийлари назорати остида, улар НАТОнинг бошқа мамлакатларидан келган ҳарбийлар ёрдамида аэропортда эвакуация ишларини амалга оширмоқда.
«Толибон» вакиллари чет эл фуқаролари ва мамлакатни тарк этмоқчи бўлган афғонистонликларнинг кетишига тўсқинлик қилмасликка ваъда берган. Аммо оммавий ахборот воситалари хабарига кўра, аэропортга боришга уринаётган одамлар катта қийинчиликларга дуч келмоқда, чунки у ерга олиб борадиган барча йўналишлар «Толибон» блокпостлари томонидан назорат қилинади. Бундан ташқари «Толибон» 31 августдан кейин одамларни эвакуация қилишни тақиқламоқчи. Афғонистонда эвакуация ишлари қандай кетаётгани ҳақида «Коммерсантъ» фоторепортаж тайёрлади.
Афғонистондан нафақат АҚШ ва НАТО мамлакатлари фуқаролари, шунингдек, «Толибон»га қарши курашда Ғарбга ёрдам берган афғонистонликлар ҳам эвакуация қилинмоқда. «Толибон» таъқибидан қўрққан минглаб афғонлар учиб кетишни хоҳлайди, 16 август куни эрталаб улар рейслардан бирортасига ўтириш учун учиш майдонига бостириб кирган ва ерда турган самолётларга осилиб чиқишга ҳаракат қилган. Ҳодиса оқибатида 7 киши ҳалок бўлган.
17 август куни АҚШ ҳарбий-ҳаво кучларига тегишли C-17 Globemaster III ҳарбий транспорт самолётида Кобул аэропортидан 640 га яқин афғонистонлик эвакуация қилинди. Дастлаб шунча одамни бортга олиб чиқиш режалаштирилмаган эди, бироқ афғон гуруҳлари учиш майдонига бостириб кириб, самолётга ўзлари чиқиб олган. Шундан сўнг экипаж уларни куч билан тушириб юбормасликка, аксинча бортдаги ҳаммани олиб учишга қарор қилган.
Аввалроқ АҚШ президенти Жо Байден август ойининг ўрталаридан бери 28 минг, июлдан бери 33 минг одам эвакуация қилинганини айтганди, шу билан бирга, эвакуация тезлашган: сўнгги 36 соат ичида 11 минг киши эвакуация қилинган.
«Толибон» 31 августни АҚШ қўшинларининг Афғонистондан олиб кетилиши учун сўнгги муддат деб белгилади. Шунингдек, АҚШ ва Буюк Британияга эвакуация учун қўшимча вақт берилмайди. Таъкидланишича, агар хорижий контингент белгиланган санага қадар мамлакатни тарк этмаса, у ҳолда ҳаракат тарафидан жавоб кўрсатилади.
CNN маълум қилишича, АҚШ ҳукумати Кобул аэропортига киришни чеклашга қарор қилди. Аэропортга фақат АҚШ ва НАТО мамлакатлари фуқаролари, шунингдек, грин-карта эгалари кириши мумкин. Номзодларни фильтрлашда энди «Толибон» ёрдам беради.
Шунингдек, «Толибон» ҳам Афғонистон фуқароларини Кобул аэропортига киритмай қўйди, энди фақат чет элликлар учиб кетиши мумкин.
Мавзуга доир: Германиянинг иккинчи эвакуация самолёти 125 нафар йўловчи билан Афғонистондан Тошкентга учиб келди
Изоҳ (0)