O‘zbekistonda benzin bir yil ichida 39 foizga qimmatladi

2021-yilning birinchi yarim yilligida O‘zbekistonda benzin narxi 17 foizga qimmatladi. Bu haqda Davlat statistika qo‘mitasiga tayanib, “Xabar.uz” xabar berdi.

Ma’lum qilinishicha, iyun oyida benzin 2,5 foizga, propan esa 8,7 foizga qimmatlagan. Transport vositalariga texnik xizmat ko‘rsatish va ta’mirlash 8,2 foizga oshgan.

“Bir yillik hisobda benzin narxi 38,9 foizgacha ko‘tarilgan”, — deyiladi xabarda.

Avvalroq O‘zbekistonda 2021-yil boshidan buyon ishlab chiqarilgan benzinning deyarli barchasi Buxoro viloyati hisobiga to‘g‘ri kelayotgani to‘g‘risida xabar berilgandi.

Eslatib o‘tamiz, 2020-yil 1-maydan boshlab Ai-80 markali avtomobil benzini va dizel yoqilg‘isi (shu jumladan, EKO markali dizel yoqilg‘isi) chakana narxlarini davlat tomonidan tartibga solish bekor qilindi. Shundan so‘ng 3-maydan boshlab Ai-80 benzinining narxi 500 so‘mga pasayib, bir litri 4000 so‘mdan sotila boshladi. 2020-yilning dekabrida mazkur markadagi benzinining o‘rtacha boshlang‘ich narxi 2,6 foizga ko‘tarilgandi. 2021-yilning yanvar oxirlarida Ai-80 benzini narxi 110 so‘mga qimmatlashgan, 2021-yilning fevralida ushbu benzin narxi qariyb 5 foizga oshgandi. Mart oyida 1,4 foizga pastlagan bo‘lsa, aprel oyida 0,2 foizga, may oyida 3 foizga yana oshgan. Toshkentda iyun oxirlarida eng xaridorgir Ai-80 markadagi benzin narxi 6000 so‘mga ko‘tarilgani ijtimoiy tarmoqlar foydalanuvchilari o‘rtasida qizg‘in muhokamalarga sabab bo‘lgandi.