“Uch nafarining ahvoli o‘rta og‘ir”. Maktabgacha ta’lim vazirligi Oqqorg‘ondagi bog‘chada zaharlangan bolalar haqida ma’lumot berdi

Toshkent viloyatining Oqqo‘rg‘on tumanidagi bog‘chada 12-avgust kuni 25 nafar bola zaharlanib, shifoxonaga yotqizilgandi. 13-avgust kuni tibbiyot muassasalariga yotqizilgan tarbiyalanuvchilar soni 30 nafarga yetgandi. Maktabgacha ta’lim vazirligi ushbu bolalarning ahvoli haqidagi kunlik ma’lumotini e’lon qildi.

19-avgust 16:00 soat holatiga ko‘ra, tibbiyot muassasalarida jami 9 tarbiyalanuvchi davolanmoqda, jumladan, 3 nafarining ahvoli — o‘rta og‘ir, 5 nafar bemorning ahvoli o‘rtacha baholanib, dinamikada sog‘aymoqda, 1 nafar bolaning ahvoli esa qoniqarli.

Ta’kidlanishicha, Maktabgacha ta’lim vazirligi tomonidan tarbiyalanuvchilarning salomatligi va o‘tkazilayotgan surushtiruv ishlari natijalari bo‘yicha ma’lumot beriladi.

“Bugungi kunga kelib 21 nafar tarbiyalanuvchiga uyiga ruxsat berilgan”, — deyiladi xabarda.

Eslatib o‘tamiz, ushbu bog‘cha tarbiyalanuvchilari zaharlangani holati yuzasidan Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan. Tergov harakatlari olib borilmoqda.