Ўзбекистонда бензин бир йил ичида 39 фоизга қимматлади

2021 йилнинг биринчи ярим йиллигида Ўзбекистонда бензин нархи 17 фоизга қимматлади. Бу ҳақда Давлат статистика қўмитасига таяниб, «Xabar.uz» хабар берди.

Маълум қилинишича, июнь ойида бензин 2,5 фоизга, пропан эса 8,7 фоизга қимматлаган. Транспорт воситаларига техник хизмат кўрсатиш ва таъмирлаш 8,2 фоизга ошган.

«Бир йиллик ҳисобда бензин нархи 38,9 фоизгача кўтарилган», — дейилади хабарда.

Аввалроқ Ўзбекистонда 2021 йил бошидан буён ишлаб чиқарилган бензиннинг деярли барчаси Бухоро вилояти ҳисобига тўғри келаётгани тўғрисида хабар берилганди.

Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг 3 майдан бошлаб Аи-80 бензинининг нархи 500 сўмга пасайиб, бир литри 4000 сўмдан сотила бошлади. 2020 йилнинг декабрида мазкур маркадаги бензинининг ўртача бошланғич нархи 2,6 фоизга кўтарилганди. 2021 йилнинг январь охирларида Аи-80 бензини нархи 110 сўмга қимматлашган, 2021 йилнинг февралида ушбу бензин нархи қарийб 5 фоизга ошганди. Март ойида 1,4 фоизга пастлаган бўлса, апрель ойида 0,2 фоизга, май ойида 3 фоизга яна ошган. Тошкентда июнь охирларида энг харидоргир Аи-80 маркадаги бензин нархи 6000 сўмга кўтарилгани ижтимоий тармоқлар фойдаланувчилари ўртасида қизғин муҳокамаларга сабаб бўлганди.