“Keyingi 3-4 yilda ortiqcha tekshirishlar, to‘siq va g‘ovlarning ko‘piga barham berildi” – Shavkat Mirziyoyevning tadbirkorlar bilan ochiq muloqoti boshlandi

Toshkent shahridagi O‘zbekiston xalqaro anjumanlar saroyida Prezident Shavkat Mirziyoyevning tadbirkorlar bilan ochiq muloqoti boshlandi. Unda davlat rahbari nutq so‘zlamoqda, deya xabar bermoqda “Daryo” muxbiri.

“Hurmatli tadbirkorlar siz kabi ishning ko‘zini biladigan, ishbilarmon yurtdoshlarimiz timsolida, biz chin ma’nodagi Yangi O‘zbekiston bunyodkorlarini ko‘ramiz. Mamlakatimizda har yili yaratilayotgan ish o‘rinlarining 90 foizi xususiy sektor hissasiga to‘g‘ri kelmoqda. Ularda hozirgi kunda, 5 milliondan ziyod aholi, ayniqsa, yoshlarimiz mehnat qilmoqdalar.

Agar biz, iqtisodiyotimizni yanada yuksaltiramiz desak, tadbirkorlikni rivojlantirish uchun, barcha imkoniyat va sharoitlarni yaratib berishimiz zarur.

Albatta, keyingi 3-4 yilda tadbirkor uchun kredit va subsidiya olish, litsenziya, ko‘chmas mulk va resurslarga ega bo‘lish, eksport kabi masalalarda,ko‘plab yangi-yangi imkoniyat va sharoitlarni yaratdik. Ortiqcha tekshirishlar, naqd pul, valyuta va xom ashyo bo‘yicha mavjud cheklovlar, to‘siq va g‘ovlarning ko‘piga, barham berildi”, — deydi davlat rahbari.

“Natijada, ichki va tashqi bozorda o‘z mustahkam o‘rniga, nufuzi va brendiga ega bo‘lgan, haqiqiy tadbirkorlarimiz sinfi kun sayin shakllana boshladi. Masalan, birgina Namangan viloyatida ‘Chust tekstil’ (aka-uka Ismatullayevlar), Art soft xolding (aka-uka Boboxonovlar), Toshkent shahridagi Texno Eksport (Sherzod Qosimov), Toshkent viloyatida ‘Nyu Vey Indastriz’ (Sardor Abbosxonov), Samarqandda ‘Oxalik Oltin bog‘i’ (Olim Soliyev) kabi korxonalar o‘z faoliyatini ‘nol’dan boshlab, hozirgi kunda, 10-15 million dollarlik mahsulot eksport qilmoqdalar.

Ayni paytda ularning har biri, minglab ish o‘rinlarini yaratib, nufuzli yirik kompaniyalarga aylandi. Bular kabi yuqori samarali korxonalar, har bir hududda ko‘plab topiladi.

Kamol Abdullayev, Qutlimurat Panayev, Murtazo Rahmatov, Ulug‘bek Sotiboldiyev, Ulug‘bek To‘xtaboyev, Murod Yoqubov, Zafar Hoshimov, Shavkat Jamolov, Murod Nazarov, aka-uka Mamasaidovlar, Farrux Fuzailov, Baxtiyor Azizxo‘jayev, Farhod Mamajanov, Bekzod Mamatqulov, Baxtiyor Umarov kabi nufuzli tadbirkorlarimiz, o‘z bizneslarini butun mamlakat miqyosida kengaytirmoqdalar”, — deydi Shavkat Mirziyoyev.

Avvalroq Shavkat Mirziyoyev tadbirkorlar bilan uchrashuvga tayyorgarlikning borishi bo‘yicha yig‘ilish o‘tkazgani, O‘zbekiston Prezidenti bilan bo‘ladigan uchrashuvda tadbirkorlarning qaysi qatlami ishtirok etishi hamda Toshkentda o‘zganing tovar belgisidan noqonuniy foydalanib kelgan Subway kafesining rahbari jarimaga tortilgani haqida xabar berilgandi.