O‘zbekistonda so‘nggi ikki yilda xotin-qizlar va yoshlar tadbirkorligini rivojlantirishga 500 mln dollar yo‘naltirilgan

O‘zbekistonda so‘nggi besh yilda yosh tadbirkorlar besh barobar ko‘payib, ularning soni 500 mingdan oshdi. Bu haqda ayni paytda bo‘lib o‘tayotgan Prezident Shavkat Mirziyoyevning tadbirkorlar bilan ochiq muloqotida qayd etildi, deya xabar bermoqda “Daryo” muxbiri.

Men, bugun ushbu zalda va joylardagi studiyalarda qatnashayotgan, yuzlab tadbirkor yoshlar va opa-singillarimizni ko‘rib turganimdan, benihoyat xursandman. Biz keyingi 2 yilning o‘zida, faqatgina xotin-qizlar va yoshlar tadbirkorligini rivojlantirishga 500 million dollar mablag‘ yo‘naltirdik. Ularni o‘z biznesini boshlashi, jumladan, kasb va tadbirkorlikni puxta o‘rganishi uchun, barcha shart-sharoitlar yaratildi.

Namangandan Anna Dobrix, marg‘ilonlik Nargiza Aminova, xorazmlik Shaxlo Yuldasheva, Toshkent shahridan Munira Kariyeva, Madina Ayupova, Toshkent viloyatidan Nargiza Bekmuratova, surxondaryolik Muxabbat Qayumova kabi yuzlab ayollarimiz, bugungi kunda elda tanilgan tadbirkorga aylandilar.

So‘nggi besh yilda yosh tadbirkorlar besh barobar ko‘payib, ularning soni 500 mingdan oshdi.

Tadbirkor ayollar va yoshlar safini yanada kengaytirish, ularni har tomonlama qo‘llab-quvvatlash bundan keyin ham, iqtisodiy siyosatimizning eng ustuvor yo‘nalishlaridan biri bo‘lib qoladi.

Shavkat Mirziyoyev, O‘zbekiston Prezidenti