Germaniyaning Schmid GmbH kompaniyasi uch eshikli Lada Niva yo‘ltanlamasining elektrodvigatelda harakatlanadigan versiyasini yaratdi. Bu orqali kompaniya o‘zining yangi mahsuloti — Elantrie ehtiyot qismlari jamlanmasini reklama qilishga uringan. Ishlab chiqaruvchining fikricha, ular yordamida deyarli har qanday an’anaviy motorli avtomobilni elektrokarga aylantirish mumkin, deb xabar beradi Motor.
Lada Niva Legend’ni qayta ishlash davomida uning 1,7 litrli klassik motori olib tashlangan. Uning o‘rniga Schmid GmbH muhandislari 65 kilovatt yoki 85 ot kuchini taqdim etuvchi elektrodvigatel o‘rnatgan. U sig‘imi 30 kilovatt-soatga teng litiy-temir-fosfatli batareya bo‘lib, bir marta quvvatlanish orqali mashinaning 300 kilometr harakatlanishini ta’minlaydi. Kompaniyadagilarning aytishicha, akkumulyator to‘qqiz marta qayta quvvatlanish sikliga bardoshli — bu 25 yilga yetadi degani. Bundan tashqari, avtomobil yukxonasida 220 voltli rozetka ham paydo bo‘lgan.
Schmid GmbH kompaniyasining hisob-kitoblariga ko‘ra, Lada haydovchisi yiliga o‘rtacha 2190 litr benzin sarflaydi (3175 yevro). Bu muddat davomida elektrlashtirilgan Niva esa 1174 yevrolik energiya sarflaydi (kilovatti 0,30 yevrodan). Shu orqali haydovchi yiliga 2 ming yevro tejab qoladi.
Bu kabi elektrodvigatelni Lada’dan tashqari Dacia (Renault) Sandero’ga o‘rnatish taklif etiladi. Jamlanma narxi noma’lum, ammo Lada Niva narxi e’lon qilingan: 19 990 yevro.
Avvalroq Xitoyda 10 kishi sig‘adigan elektromobil 4 ming dollar qiymatida sotuvga chiqqani, Xitoyning Roewe Marvel R yo‘ltanlamasi 5G V2X funksiyasiga ega dunyodagi birinchi “aqlli” elektromobilga aylangani, Xitoyda taksichilar uchun ideal avtomobil taqdim etilishi to‘g‘risida xabar berilgandi.
Izoh (0)