YouTube’dagi Rahul R kanalida London ko‘chalarida eshigi ochiq holda harakatlangan Tesla Model X elektrokari bilan sodir bo‘lgan ko‘ngilsiz hodisa videosi paydo bo‘ldi. Unda krossover ikki qavatli avtobus bilan “uchrashgani” tasvirlangan: oqibatda Model X’ning eshigi jiddiy pachoqlangan va dabldeker oynasi singan, deb xabar beradi Motor.
Eshigi ochiq holda harakatlangan Tesla Model X o‘ng tarafdan harakatlanayotgan avtobus oynasini — aynan haydovchi o‘tiradigan joyni sindirgan. Aftidan, avtobus va Tesla haydovchilariga hech qanday shikast yetmagan: elektrokar u qadar tez harakatlanmayotgan bo‘lgan. Oynani sindirgan eshik avtobus bortiga yana bir bor urilib, egilib ketgan va tabiiy bo‘lmagan holatda yopilgan.
Elektrokrossover “lochin qanoti” kabi ko‘tarma eshiklar bilan jihozlangan. Ularni yopishni unutib qo‘yish juda qiyin: bu kabi holatda Model X elektronikasi salondagi ikkala displeyga ham ovozli signallarga ega vizual ogohlantirishni beradi.
Bundan tashqari, bu kabi holatda faqat past tezlikda harakatlanish mumkin — avtomobil tezlashishga ruxsat bermaydi. Shu sababli voqea barcha signallarga e’tibor qaratmagan haydovchining holati va Tesla’ning sozligi borasida turli savollarni yuzaga keltiradi.
Avvalroq eng kuchli Tesla Model S harakat vaqtida yonib ketgani, Tesla Model S Plaid’ning g‘ayrioddiy ruli shahar sharoitida boshqarishda juda noqulay bo‘lib chiqqani to‘g‘risida xabar berilgandi.
Izoh (0)