Toyota kompaniyasi Lego konstruktoridan yasalgan to‘liq o‘lchamli GR Supra nusxasini namoyish etdi. Noodatiy kupeni yasashga 2700 soat vaqt sarflangan — Gazoo Racing jamoasi va Lego yig‘uvchilar 1885 kilogrammli ulkan maket mustaqil harakatlana olishi uchun mehnat qilgan. Toyota sportkar nusxasidan faol foydalanish niyatida — 11-oktabrga qadar model Legoland Japan stendini bezab turadi, shundan so‘ng kupeni Super GT poyga seriyasi bo‘yicha tur kutmoqda, deb xabar beradi Motor.
Toyota GR Supra’ning to‘liq o‘lchamli maketi 477 303 dona Lego donasidan iborat bo‘lib, bolalar uchun mo‘ljallangan o‘yinchoqdan yig‘ilgan kupe og‘irligi 3,0 litrli BMW dvigateli o‘rnatilgan haqiqiy sportkardan chorak tonnaga og‘irroq.
Ehtiyot qismlarning bir qismi original Supra’dan olishga to‘g‘ri kelgan — gap g‘ildiraklar, “shildiklar”, haydovchi o‘rindig‘i, tepkilar, qurilmalar paneli va rul chambaragi haqida ketmoqda. Biroq barcha kuzov panellari, optika, salonning qolgan detallari Lego’dan yig‘ilgan.
Plastmassa Toyota GR Supra elektrodvigatel yordamida harakatga keladi. Ma’lum qilinishicha, Lego sportkari soatiga 28 kilometr tezlikda harakatlana oladi, biroq tormoz diskalari konstruksiyadan yasalgani sabab unga ishonish kerak emas.
Eslatib o‘tamiz, iyun oyida Lego kompaniyasi 400 mingta konstruktor detallaridan tarkib topgan to‘liq o‘lchamli Lamborghini Sian giperkarini taqdim etgandi. Uni yaratish ustida 15 nafar mutaxassis 8660 soat ish olib borgan. 1:1 masshtabdagi o‘yinchoq giperkar Lamborghini Sian FKP 37 modeli dizaynini takrorlaydi.
Izoh (0)