Mercedes-Benz EQS elektrosedanining yangilangan dasturiy ta’minoti orqa o‘rindiqdagi yo‘lovchilar uchun keng imkoniyatli axborot-ko‘ngilochar dasturlarni taqdim etadi. Oyiga 89 yevro to‘lash orqali tetris, sudoku, aeroxokkey va ko‘plab mashhur o‘yinlar o‘rin olgan paketni o‘rnatish mumkin. Tizim ko‘p foydalanuvchilar uchun mo‘ljallangan rejimni o‘z ichiga olgani sabab orqa o‘rindiqdagi yo‘lovchilarning har biri o‘z ekranidagi o‘yinni boshqara oladi, deb xabar beradi Motor.
Yangi obunachilar uchun dastlabki 12 oy davomida o‘yinlardan foydalanish bepul bo‘ladi. Simsiz yangilanishlar yordamida amalga oshiriladigan boshqa funksiyalar qatoridan konturli “podveska” uchun bir necha effektlar ham o‘rin olgan bo‘lib, u elektrokarni ochish-yopish vaqtida faollashadi, shuningdek, yiliga 50 dollar evaziga ikkita qo‘shimcha boshqaruv rejimidan foydalanish mumkin bo‘ladi. Haydashni endi o‘rgangan haydovchilar uchun sedanning tekis harakatlanishini ta’minlaydigan rejim ham mavjud — u Sport rejimini o‘chiradi, maksimal tezlikni soatiga 120 kilometrgacha cheklaydi va barqarorlashtirgich tizimini o‘chirish funksiyasini bloklaydi. Ikkinchi mavjud rejim — maksimal tezlikni soatiga 80 kilometrga qadar tushirish va haydovchining profiliga kirish imkoniyatini cheklovchi Valet Mode rejimidir.
Mercedes-Benz EQS’ning boshqa yangilanishlari qatoridan ovozli boshqaruv yordamida videoqo‘llanmadan foydalanish imkoniyati o‘rin olgan. Yevropa bozori uchun modelning orqa g‘ildiraklarini boshqarish uchun ham obuna mavjud bo‘ladi, AQShda esa bu kabi funksiya “bazaviy” narxdan o‘rin oladi. Germaniyada hashamatli elektrokar hozirda sotuvga chiqqan: EQS 450+ versiyasini 106 374 yevroga, kuchliroq EQS 580 4Matic’ni esa 135 529 yevroga xarid qilish mumkin.
Avvalroq Mercedes-Benz kompaniyasi Car-to-X Communication tizimini takomillashtirgani va yo‘lda paydo bo‘ladigan to‘siqlardan ogohlantiruvchi yangi funksiyani joriy etgani to‘g‘risida xabar berilgandi.
Izoh (0)