Jons Hopkins universiteti ma’lumotlariga ko‘ra, dunyoda COVID-19 bilan kasallanganlar soni 187 244 854 kishiga yetdi, shularning 4 038 964 nafari vafot etgan. Virusni yuqtirganlar soni bo‘yicha AQSh (33,8 million), Hindiston (30,8 million), Braziliya (19,1 million), Fransiya (5,8 million) va Rossiya (5,7 million) eng oldinda bormoqda.
Tailandda yetti kishida koronavirusning alfa va delta shtammlaridan iborat “aralash varianti” aniqlandi.
Mamlakat Sog‘liqni saqlash vazirligi Ilmiy-tibbiy tadqiqotlar departamenti rahbari Supxakit Sirila ma’lum qilishicha, COVID-19’ning biryo‘la ikkita shtammi Bangkokdagi yirik qurilish maydonida ishlayotgan yetti ishchida aniqlangan.
Obyektda ishlayotgan 1737 kishining 1327 nafarida koronavirus qayd etilgan. Shularning 23,3 foizi alfa, 73,7 foizi delta shtammiga chalingan.
Bir vaqtning o‘zida ikkita shtamm aniqlangan quruvchilar barqaror ahvolda bo‘lib, ularda “tashvishli simptomlar” kuzatilgani yo‘q. Sirilaning aytishicha, biryo‘la ikkita shtammni yuqtirib olish bemorning simptomlari jiddiyroq bo‘lishini anglatmaydi. “Ammo aralash infeksiya holatlarining ko‘payishi gibridga olib kelishi va oxir-oqibat yangi shtammning paydo bo‘lishiga turtki berishi mumkin, buni esa biz xohlamaymiz”, — dedi mutaxassis.
Departament rahbari qayd etishicha, delta shtammi yaqin orada Tailand hududida alfa shtammni quvib o‘tib, asosiy variantga aylanishi mumkin. Bangkokda bu allaqachon sodir bo‘lgan — u yerda delta shtamm bilan kasallanganlar ulushi 57,1 foizni tashkil etadi.
Jahon sog‘liqni saqlash tashkiloti (JSST) Shimoliy Koreyada haligacha COVID-19’ga chalinish bo‘yicha birorta holat qayd etilmaganini ma’lum qildi.JSSTning haftalik hisobotiga ko‘ra, KXDRda test topshirgan 718 kishidan 127 nafari (ularda simptomlar kuzatilgan) grippga o‘xshash kasallik yoki O‘RVI bilan kasallangan bo‘lib chiqqan. Shu tariqa mamlakatda testdan o‘tgan odamlarning umumiy soni 32 mingdan oshgan.
Seul tahliliy markazi ma’lum qilishicha, Pxenyan JSST tashabbusi doirasidagi 1,7 million doza AstraZeneca vaksinasidan voz kechgan. Xabarlarga ko‘ra, Shimoliy Koreya nojo‘ya ta’sirlardan xavfsirab, taklifni rad etgan.
Ta’kidlanishicha, Shimoliy Koreya JSSTga COVID-19 haqidagi ma’lumotlarni o‘zi taqdim etadi, bu raqamlarni mustaqil tekshirish iloji yo‘q. Pxenyan 2020-yil yanvaridan chegara nazorati bo‘yicha qat’iy choralarni kiritgan.
Mavzuga doir: Kim Chen In mansabdorlarni koronavirusga qarshi kurashda xatolikka yo‘l qo‘ygani uchun tanqid qildi
“O‘tgan hafta butun dunyoda COVID-19 holatlari sonining o‘sishi yuz bergan ketma-ket to‘rtinchisi bo‘ldi”, — dedi tashkilot bosh direktori Tedros Gebreyesus.
Shuningdek, koronavirusdan o‘lim holatlari o‘n hafta davomida kamayib kelib, endi ko‘payishni boshlagan.
COVID-19 bilan bog‘liq vaziyatning yomonlashuvi virusning delta shtammi tarqalishi bilan bog‘lanmoqda.
Shuningdek:- Buyuk Britaniya 19-iyul kuni koronavirus cheklovlarini yumshatishning yakuniy bosqichiga o‘tadi. Hukumat majburiy niqob rejimi va ijtimoiy masofani bekor qilishga qaror qildi. Bundan tashqari, endi odamlar uydan ishlashga da’vat etilmaydi va ish beruvchilarga xodimlarni ofislarga qaytarish imkoniyati taqdim etiladi.
- Fransiya va Gretsiya tibbiyot xodimlari uchun COVID-19’ga qarshi majburiy vaksinatsiya joriy qiladi. Fransiya prezidenti mamlakatda tibbiyot xodimlari hamda kasallikka chalinuvchan toifadagi fuqarolar bilan muloqotda bo‘ladigan barcha odamlar uchun emlanish majburiy bo‘lishini bildirdi. Ular 15-sentabrgacha emlanishi kerak. Gretsiyada esa tibbiyot xodimlariga emlanish uchun 1-sentabrgacha muddat berildi.
Izoh (0)