Qozog‘istonda epidemiologik vaziyatning yomonlashuvi munosabati bilan Idoralararo komissiya “qizil” zonada joylashgan hududlarda karantin cheklovlarini kuchaytirish bo‘yicha choralar ko‘rdi. Bu haqda Tengrinews xabar berdi.
Bosh vazir o‘rinbosari Erali Tugjanov shaharlararo, mintaqalararo, shaharlardagi muntazam va nomuntazam (turistik) avtobus va mikroavtobuslar harakatini, shuningdek, yopiq plyajlar va akvaparklar faoliyatini to‘xtatib turishni buyurdi.
Shuningdek, Qozog‘istonda dam olish va ta’til kunlarida quyidagi obyektlarning faoliyatini taqiqlash to‘g‘risida qaror qabul qilindi:
- jamoaviy ovqatlanish obyektlari;
- fitnes markazlari, fitnes-klublari, yoga markazlari, sport va dam olish maskanlari, saunalar, SPA-markazlari, suzish havzalari;
- kinoteatrlar, teatrlar, konsert zallari, filarmoniyalar, kompyuter klublari, bouling zallari, bilyard xonalari, karaoke, ko‘rgazmalar;
- maydoni 2000 kvadrat metrgacha bo‘lgan nooziq-ovqat mahsulotlarini sotish obyektlari, ochiq bozorlar, yarmarkalar;
- sport obyektlari (sport majmualari, sport maktablari, sport klublari, mashg‘ulotlar zallari);
- o‘quv markazlari, bolalar va kattalar uchun to‘garaklar, bolalarni rivojlantirish markazlari;
- fudkortlar.
Mamlakatda ish kunlari quyidagi obyektlar faoliyatini cheklash bo‘yicha ko‘rsatma berildi:
- Ashyq loyihasida ishtirok etadigan fitnes markazlari, fitnes-klublari, yoga markazlari, sport va dam olish maskanlari, saunalar, SPA-markazlari, sport inshootlari, suzish havzalari soat 20:00 gacha;
- savdo va ko‘ngilochar markazlar, savdo uylari, chakana savdo tarmoqlari soat 18:00 gacha;
- Ayshq loyihasida ishtirok etadigan ovqatlanish shoxobchalari, fudkortlar soat 20:00 gacha, loyihada qatnashmaydiganlar — soat 18:00 gacha.
Ma’lumot uchun, ayni paytda Nur-Sulton, Olmaota, Chimkent, Oqmola, Aqto‘be, Atirau, G‘arbiy Qozog‘iston, Qarag‘anda, Qo‘stanoy, Mangistov va Pavlodar viloyatlari “qizil” zonaga kiritilgan.
Avvalroq Qozog‘istonda koronavirusga chalinganlar soni bo‘yicha kunlik rekord yangilangani, Nur-Sultonda karantin cheklovlari yana kuchaytirilgani, poytaxtda koronavirusning “hindcha” shtammi qayd etilgani haqida xabarlar berilgandi.
Izoh (0)