Iroq janubidagi Di-Qar viloyatining Nasiriya shahridagi COVID-19 bemorlariga mo‘ljallangan kasalxonada yong‘in sodir bo‘ldi. Hodisa qurbonlarining soni 77 kishiga yetdi, 20 kishi evakuatsiya natijasida qutqarib qolindi, deb yozmoqda Al Arabiya telekanali viloyat Sog‘liqni saqlash boshqarmasiga asoslanib.
Qayd etilishicha, qurbonlarning aksariyati kuyish yoki bo‘g‘ilishdan vafot etgan. Shuningdek, hodisa natijasida 70 ga yaqin odam jarohat olgan.
Dastlab Sog‘liqni saqlash boshqarmasi yong‘inda 46 kishi halok bo‘lgani haqida xabar qilgan.
“Nasiriya shahridagi Imom Husayn kasalxonasining koronavirusga chalingan odamlar uchun ajratilgan izolyatorida sodir bo‘lgan yong‘in tufayli 46 kishi halok bo‘ldi, 70 kishi jarohat oldi”, — deyilgandi boshqarma xabarida. Keyinchalik boshqarma qurbonlar soni 52 kishiga yetganini ma’lum qildi.
Dastlabki ma’lumotlarga ko‘ra, COVID-kasalxonada yong‘in chiqishiga kislorod ballonining portlashi sabab bo‘lgan. Shuningdek, versiyalardan birida yong‘in sababi qisqa tutashuv ekani aytilgan. Iroq Sog‘liqni saqlash vazirligi yong‘in sabablarini rasman e’lon qilmadi.
Xabarga ko‘ra, o‘nlab odamlar kasalxonada qamalda qolgan, ammo o‘t o‘chiruvchilar yong‘in tarqalishini cheklashga muvaffaq bo‘ldi. Hodisa munosabati bilan viloyat Sog‘liqni saqlash vazirligi favqulodda holat e’lon qildi.
Telekanal manbalarining xabar berishicha, yong‘in sodir bo‘lgan filial atigi uch oy oldin ochilgan. U 70 nafar bemorga mo‘ljallangan edi.
Di-Qara Sog‘liqni saqlash boshqarmasi vakili Ammar al-Zamilining mahalliy OAVga aytishicha, yong‘in boshlanganda bo‘limda kamida 63 bemor bo‘lgan. Ta’kidlanishicha, bino yonuvchan materiallardan qurilgan.
Eslatib o‘tamiz, 24-aprel kuni Iroqning Bag‘dod shahrida joylashgan Ibn al-Xatib kasalxonasida yong‘in sodir bo‘lgandi. Kasalxonada yong‘indan himoya tizimi bo‘lmagan. Dastlabki ma’lumotlarga ko‘ra, yong‘in boshlanishiga kislorod ballonining portlashi sabab bo‘lgan. So‘nggi ma’lumotlar bo‘yicha 88 kishi halok bo‘lgan, 100 dan ortig‘i jarohat olgan. Qurbonlarning kamida 28 nafari sun’iy nafas oldirish apparatlariga ulangan bemorlar bo‘lgan.
O‘sha yong‘indan keyin Iroqda uch kunlik motam e’lon qilingandi. Iroq sog‘liqni saqlash vaziri va Bag‘dod gubernatori ishdan bo‘shatilgan.
Izoh (0)