Жонс Ҳопкинс университети маълумотларига кўра, дунёда COVID-19 билан касалланганлар сони 187 244 854 кишига етди, шуларнинг 4 038 964 нафари вафот этган. Вирусни юқтирганлар сони бўйича АҚШ (33,8 миллион), Ҳиндистон (30,8 миллион), Бразилия (19,1 миллион), Франция (5,8 миллион) ва Россия (5,7 миллион) энг олдинда бормоқда.
Таиландда етти кишида коронавируснинг алфа ва дельта штаммларидан иборат «аралаш варианти» аниқланди.
Мамлакат Соғлиқни сақлаш вазирлиги Илмий-тиббий тадқиқотлар департаменти раҳбари Супхакит Сирила маълум қилишича, COVID-19’нинг бирйўла иккита штамми Бангкокдаги йирик қурилиш майдонида ишлаётган етти ишчида аниқланган.
Объектда ишлаётган 1737 кишининг 1327 нафарида коронавирус қайд этилган. Шуларнинг 23,3 фоизи алфа, 73,7 фоизи дельта штаммига чалинган.
Бир вақтнинг ўзида иккита штамм аниқланган қурувчилар барқарор аҳволда бўлиб, уларда «ташвишли симптомлар» кузатилгани йўқ. Сириланинг айтишича, бирйўла иккита штаммни юқтириб олиш беморнинг симптомлари жиддийроқ бўлишини англатмайди. «Аммо аралаш инфекция ҳолатларининг кўпайиши гибридга олиб келиши ва охир-оқибат янги штаммнинг пайдо бўлишига туртки бериши мумкин, буни эса биз хоҳламаймиз», — деди мутахассис.
Департамент раҳбари қайд этишича, дельта штамми яқин орада Таиланд ҳудудида алфа штаммни қувиб ўтиб, асосий вариантга айланиши мумкин. Бангкокда бу аллақачон содир бўлган — у ерда дельта штамм билан касалланганлар улуши 57,1 фоизни ташкил этади.
Жаҳон соғлиқни сақлаш ташкилоти (ЖССТ) Шимолий Кореяда ҳалигача COVID-19’га чалиниш бўйича бирорта ҳолат қайд этилмаганини маълум қилди.ЖССТнинг ҳафталик ҳисоботига кўра, КХДРда тест топширган 718 кишидан 127 нафари (уларда симптомлар кузатилган) гриппга ўхшаш касаллик ёки ЎРВИ билан касалланган бўлиб чиққан. Шу тариқа мамлакатда тестдан ўтган одамларнинг умумий сони 32 мингдан ошган.
Сеул таҳлилий маркази маълум қилишича, Пхенян ЖССТ ташаббуси доирасидаги 1,7 миллион доза AstraZeneca вакцинасидан воз кечган. Хабарларга кўра, Шимолий Корея ножўя таъсирлардан хавфсираб, таклифни рад этган.
Таъкидланишича, Шимолий Корея ЖССТга COVID-19 ҳақидаги маълумотларни ўзи тақдим этади, бу рақамларни мустақил текшириш иложи йўқ. Пхенян 2020 йил январидан чегара назорати бўйича қатъий чораларни киритган.
Мавзуга доир: Ким Чен Ин мансабдорларни коронавирусга қарши курашда хатоликка йўл қўйгани учун танқид қилди
«Ўтган ҳафта бутун дунёда COVID-19 ҳолатлари сонининг ўсиши юз берган кетма-кет тўртинчиси бўлди», — деди ташкилот бош директори Тедрос Гебрейесус.
Шунингдек, коронавирусдан ўлим ҳолатлари ўн ҳафта давомида камайиб келиб, энди кўпайишни бошлаган.
COVID-19 билан боғлиқ вазиятнинг ёмонлашуви вируснинг дельта штамми тарқалиши билан боғланмоқда.
Шунингдек:- Буюк Британия 19 июль куни коронавирус чекловларини юмшатишнинг якуний босқичига ўтади. Ҳукумат мажбурий ниқоб режими ва ижтимоий масофани бекор қилишга қарор қилди. Бундан ташқари, энди одамлар уйдан ишлашга даъват этилмайди ва иш берувчиларга ходимларни офисларга қайтариш имконияти тақдим этилади.
- Франция ва Греция тиббиёт ходимлари учун COVID-19’га қарши мажбурий вакцинация жорий қилади. Франция президенти мамлакатда тиббиёт ходимлари ҳамда касалликка чалинувчан тоифадаги фуқаролар билан мулоқотда бўладиган барча одамлар учун эмланиш мажбурий бўлишини билдирди. Улар 15 сентябргача эмланиши керак. Грецияда эса тиббиёт ходимларига эмланиш учун 1 сентябргача муддат берилди.
Изоҳ (0)