Rossiyaning Gelenjik shahridagi mehmonxonada 13-iyul kuni ertalab gaz portladi. Hodisa oqibatida ikki kishi halok bo‘ldi, yana besh kishi jarohat oldi, deb yozmoqda Meduza.
Portlashdan so‘ng jabrlanganlardan biri qutqaruvchilar tomonidan vayronalar ostidan chiqarib olingan. OAV xabarlariga ko‘ra, voqea Sovetskaya ko‘chasida joylashgan “Azariya” xususiy mehmonxonasida sodir bo‘lgan.
Portlash to‘rt qavatli mehmonxonaning birinchi qavatida joylashgan do‘konda yuz bergan. Binodagi portlash birinchi qavatning ichki konstruksiyalariga zarar yetkazgan, deb xabar qilmoqda Favqulodda vaziyatlar vazirligi.
Mehmonxonadan 50 kishi evakuatsiya qilingan.
Rossiyaning Krasnodar o‘lkasi bo‘yicha Tergov qo‘mitasi tergov bo‘limi ma’lumotlariga ko‘ra, jabrlanganlar orasida voyaga yetmagan qiz ham bor. Ular turli darajadagi jarohatlar bilan kasalxonaga yotqizilgan.
Krasnodar o‘lkasi prokuraturasi matbuot xizmati xabar berishishicha, Gelenjik prokuraturasi gaz-havo aralashmasining portlashi bo‘yicha tekshiruv tashkil qildi.
Izoh (0)