Rossiya tashqi ishlar vaziri Sergey Lavrov Moskvada o‘tkazilgan matbuot anjumani davomida Amerika bazalarining Markaziy Osiyoda paydo bo‘lish ehtimolligiga izoh berdi.
“Markaziy Osiyo davlatlarining rejalari qanday ekanligini ulardan (AQShdan — tahr.) so‘rash kerak emas, buni mintaqaning tegishli davlatlari hal qiladi. Eslatib o‘tamiz, Markaziy Osiyodan tashqari, ular Pokistonga ham murojaat qilgan. Pokiston rahbariyati bu kabi variantni hatto muhokama qilmayotganliklarini ommaviy e’lon qildi. O‘zbekiston ham shu kabi bayonot berdi”, — deydi Lavrov.
Rossiya TIV rahbarining so‘zlariga ko‘ra, Markaziy Osiyodan Qozog‘iston, Tojikiston, Qirg‘iziston Kollektiv xavfsizlik shartnomasi tashkilotining (KXShT) a’zolari hisoblanadi. Shunday ekan, xorij harbiylarining KXShT a’zolari hududiga joylashtirilishiga oid masala tashkilotning nizomiga binoan shu doirada kelishib olinadi.
“Men Markaziy Osiyoda Amerika yangi harbiy obyektlarining paydo bo‘lishi ushbu mintaqadagi xavfsizlik manfaatlariga javob beradi, deb o‘ylamayman. Buni Markaziy Osiyodan hech kim yordam so‘rab murojaat qilmagani ko‘rsatib turibdi”, — deydi u.
“Amerikaliklar NATOning 100 mingdan ortiq kontingenti bilan 20 yil mamlakat ichida bo‘lgan holda biror nima qila olmagan bo‘lsa, Afg‘oniston tashqarisida sezilarli darajada kam ustunlik bilan qanday natijalarga erishmoqchi? O‘ylaymanki, bu yerda javob tushunarli.
Aftidan, gap o‘z harbiylarining Markaziy Osiyoda bo‘lishini ta’minlash va shu orqali mintaqadagi vaziyatga ta’sir ko‘rsatish xohishi haqida ketmoqda”, — deya qayd etadi Lavrov.
Avvalroq Markaziy Osiyo TIV rahbarlari Afg‘onistondagi vaziyatni muhokama qilgani, Shavkat Mirziyoyev Vladimir Putin bilan Afg‘onistonning shimoliy hududlaridagi vaziyatni muhokama qilgani hamda Shavkat Mirziyoyev va Emomali Rahmon Afg‘onistondagi keskinlikning kuchayishi bilan bog‘liq vaziyatni muhokama qilgani haqida xabar berilgandi.
Izoh (0)