Yevroittifoq Afg‘onistonga u yerdan AQSh va NATO harbiylari olib ketilganidan keyin mamlakatda vaziyatni barqarorlashtirishda o‘z yordamini taklif qilmoqchi. Bu haqda Yevroittifoqning tashqi ishlar va xavfsizlik siyosati bo‘yicha oliy vakili Jozep Borrel Yevroittifoq Tashqi ishlar vazirlari kengashi majlisi yakunlari bo‘yicha ma’lum qildi, deb yozadi “TASS”.
“Vazirlar ‘Tolibon’ni siyosiy jarayonda qatnashishga chaqirdi. Ular, shuningdek, dunyo hamjamiyatini Afg‘onistonga zarur yordamni taqdim etishga da’vat qildi. Men vaziyatni ko‘plab mintaqaviy ishtirokchilar bilan muhokama qilaman, yaqin kunlarda Toshkentda bo‘lib o‘tadigan konferensiyada (‘Markaziy va Janubiy Osiyo: o‘zaro mintaqaviy bog‘liqlik. Tahdidlar va imkoniyatlar’) ishtirok etaman, unda Afg‘oniston prezidenti ham qatnashadi. Yevropa Ittifoqi g‘arb harbiylari chiqib ketganidan keyin mamlakatni barqarorlashtirishda yordam taklif qilmoqchi”, — dedi Borrel.
AQSh va NATO o‘z qo‘shinlarini Afg‘onistondan olib ketishni 29-may kuni boshladi, ushbu mamlakatda ularning harbiy operatsiyalari boshlanganiga qariyb 20 yil bo‘ldi.
Iyul oyi boshida “Tolibon” harakati Afg‘onistonning Eron, Tojikiston, Turkmaniston, Xitoy va Pokiston bilan chegaralari yaqinida joylashgan tumanlarini o‘z nazorati ostiga oldi. Afg‘oniston Qurolli kuchlari yangi qo‘mondoni general Vali Muhammad Ahmadzoy ma’lum qilishicha, mamlakatning asosiy shaharlarini, chegara o‘tish punktlari va shosselarni “Tolibon”dan himoya qilish armiya uchun birlamchi vazifa hisoblanadi. Uning so‘zlariga ko‘ra, “Tolibon” boshliqlari dastlab mahsulotlar olib o‘tiladigan asosiy yo‘llarni to‘sib qo‘yib, so‘ng shahar va tumanlarga hujum boshlamoqchi.
Toshkent shahrida o‘tkaziladigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyada Afg‘oniston va Pokiston prezidentlari, shuningdek, Yevropa ittifoqining tashqi ishlar va xavfsizlik siyosati bo‘yicha oliy vakili, Yevrokomissiya vitse-prezidenti Jozep Borrel, 20 dan ziyod mamlakat tashqi ishlar vazirlari, nufuzli xalqaro va mintaqaviy tashkilotlar rahbarlari ishtirok etishi kutilmoqda. Ishtirokchilarning umumiy soni 600 dan ortiq.
Izoh (0)