Qozog‘istonda 2021-yilgi Qurbon hayitini nishonlash va qurbonlik qilish marosimi onlayn tarzda bo‘lib o‘tadi. Bu haqda Olmaota shahar bosh sanitariya shifokori Jandarbek Bekshin ma’lum qildi, deb yozmoqda “Zakon.kz”.
Qurbon hayitini nishonlash 20-iyulga to‘g‘ri keladi, deyiladi xabarda. Ommaviy tadbirlarni o‘tkazish bo‘yicha o‘rnatilgan cheklovlar tufayli o‘sha kuni Qozog‘istonda masjidlar yopiq bo‘ladi, ammo Qurbon hayiti nishonlanadi. Musulmonlar diniy idorasi qurbonlik marosimini iloji boricha xavfsiz o‘tkazishga harakat qilmoqda.
“2020-yili birinchi marta Qurbon hayitini onlayn rejimda o‘tkazgandik. O‘tgan yilgi tajriba shuni ko‘rsatdiki, sadaqa va Qurbon Shalu (qurbonlik marosimi)ni ham onlayn tarzda amalga oshirish mumkin. Sadaqa uchun, shuningdek, Qurbon Shaluni tashkil etish uchun mablag‘lar Qurbon-2021 veb-sayti orqali qabul qilinadi. Qurbonlikka atalgan hayvonlar Olmaota viloyatining Qorasoy tumanidagi maxsus ajratilgan maydonda so‘yiladi”, — dedi Jandarbek Bekshin.
“Interfaks” xabar berishicha, pandemiya tufayli Moskvada ham 2021-yilgi Qurbon hayiti onlayn tarzda nishonlanadi, shahar masjidlari dindorlar uchun yopiq bo‘ladi. Rossiya Musulmonlari diniy idorasi ulamolar kengashi shunday qaror qabul qilgan.
“Moskvada bayram namozi faqat Jome masjidida imomlar, muazzinlar va muftiy o‘rinbosarlar ishtirokida o‘qiladi. Boshqa masjidlarda, shuningdek, musulmonlarning mahalliy diniy tashkilotlarida bayram namozini o‘qish tavsiya etilmaydi. Barcha musulmonlar bayramona muhitni o‘z uylarida, oilalari bilan yaratishi lozim”, — deyiladi muftiyat veb-saytida.
Musulmonlar idorasi tarkibiga kiruvchi hududiy diniy boshqarmalar hayit namozini o‘qish tartibini joylardagi epidemiologik vaziyatni hisobga olgan holda mustaqil hal qiladi.
Koronavirus tarqalishiga yo‘l qo‘ymaslik maqsadida Moskva hukumati Ramazon hayiti kuni ham asosiy masjidlarda hayit namozi uchun to‘planishni taqiqlagan edi.
Izoh (0)