Tojikiston Afg‘oniston bilan chegaraga qo‘shimcha qo‘shinlarni yuboradi, chegarani yanada mustahkamlash uchun zaxiradagi yana 20 ming harbiyni safarbar qiladi. Bu haqda Tojikistonning Kollektiv xavfsizlik to‘g‘risidagi shartnoma tashkiloti (KXShT)dagi doimiy va muxtor vakili Hasan Sultonov ma’lum qildi, deb yozadi “Interfaks”.
Sultonov 7-iyul kuni KXShT doimiy kengashi majlisida aytib o‘tishicha, Afg‘oniston bilan chegaradagi murakkab vaziyat tufayli 5-iyul kuni Tojikiston Xavfsizlik kengashining Respublika prezidenti Emomali Rahmon raisligida majlisi bo‘lib o‘tgan.
Rahmon Xavfsizlik kengashi a’zolariga, kuch tuzilmalari va huquq-tartibot organlari rahbarlariga “Tojikiston va Afg‘oniston chegarasida davlat va millat xavfsizligini ta’minlash bo‘yicha muayyan choralar ko‘rish”ni topshirgan.
Uning ta’kidlashicha, shuningdek, “davlat chegarasida qonun buzilishlarining oldini olish, xususan, transmilliy jinoyatchilik, terrorizm, ekstremizm va narkotiklarning noqonuniy aylanmasiga yo‘l qo‘ymaslikka alohida e’tibor qaratish” buyurilgan.
Hasan Sultonov Tojikiston qo‘shni Afg‘oniston bilan chegarani himoya qilishda yordam olishni mo‘ljallayotganini qayd etdi.
U tojik-afg‘on chegarasini mustahkamlash to‘g‘risidagi 2013-yilgi shartnoma borligini eslatib o‘tdi. “Tashkilotga a’zo davlatlarni ushbu hujjatni to‘liq amalga oshirishga o‘z hissasini qo‘shishga chaqirishni istardim”, — dedi u.
Tojikiston vakili, shuningdek, Afg‘onistondan xalqaro koalitsiya asosiy kuchlari chiqarib ketilganidan keyin u yerda nimalar yuz berayotgani haqida gapirib berdi. 21-iyundan chegara hududida Afg‘oniston hukumat armiyasi va “Tolibon” harakati o‘rtasida janglar bo‘lib o‘tgan. Shu hafta ekstremistlar Tojikiston bilan chegaradosh Badaxshon viloyati hududidagi qishloqlarni egallab olgan. Natijada “Tolibon” endi chegaraning 900 kilometrdan ortiq qismini nazorat qilmoqda (chegaraning jami uzunligi 1340 km).
5-iyul kuni Tojikiston prezidenti Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgani,Vladimir Putin Tojikistonga Afg‘oniston bilan chegaradagi vaziyatning keskinlashuvi munosabati bilan yordam berishni va’da qilgani, O‘zbekiston Prezidenti Shavkat Mirziyoyev 5-iyul kuni Vladimir Putin bilan telefon orqali muloqot qilib, suhbat davomida Afg‘onistonning shimoliy hududlaridagi ahvol yomonlashishi fonida Markaziy Osiyodagi vaziyatning rivojiga alohida to‘xtalib o‘tgani haqida xabarlar berilgandi.
Shuningdek, Turkmaniston Afg‘oniston bilan chegara hududidagi harbiy safarbarlikni kuchaytiradi.
Izoh (0)