Taxminan 1500 ming nafar Afg‘oniston harbiylari “Tolibon” vakillari bilan harbiy to‘qnashuvlardan keyin oxirgi ikki hafta ichida Tojikiston hududiga qochib o‘tgan. Bu haqda Tojikistonning Jamoaviy xavfsizlikni ta’minlash tashkilotidagi vakili Hasan Sultonov ma’lum qildi, deb yozmoqda “Interfaks”.
Sultonovning so‘zlariga ko‘ra, tashkilotning doimiy kengash yig‘ilishida Afg‘oniston hukumatining harbiy qo‘shinlari “Tolibon” bilan to‘qnashuvlardan keyin chegara hududlaridan mamlakatga kirib kelganini qayd etgan.
Shuningdek, Tojikistonning tashkilotdagi vakili 5-iyul kuni “Tolibon”ning Afg‘onistonda Tojikiston bilan 910 kilometr masofaga cho‘zilgan chegara hududlari yaqinida Badaxshon viloyatidagi Xoxon, Nusay, Mohimay, Shugnon va Sulton Ishhoshim qishloqlarini egallagani haqida gapirgan.
Jamoaviy xavfsizlikni ta’minlash tashkiloti tarkibiga Armaniston, Belarus, Qozog‘iston, Qirg‘iziston, Rossiya hamda 2021-yilda tashkilotga rahbarlikni qabul qilib olgan Tojikiston davlatlari kiradi. Tashkilot tezkor munosabat bildirish uchun jamoaviy harbiy kuchlarga ega.
6-iyulda Tojikistonga Rossiya mudofaa vazirligining samolyotida tashkilot birlashgan shtabi boshlig‘i Anatoliy Sidorov Afg‘oniston bilan chegaradagi vaziyatga tezkor baho berish guruhi bilan birgalikda yetib kelgan.
“Tezkor guruhning asosiy maqsadi tojik-afg‘on chegarasidagi vaziyatni monitoring qilish va tashkilot formatida qo‘shma chora-tadbirlar bo‘yicha takliflar berishdan iborat”, – deya Sidorovning so‘zlarini keltirgan Jamoaviy xavfsizlikni ta’minlash tashkiloti matbuot xizmati.
Afg‘onistondagi vaziyatAfg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak.
Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunlagan. AQSh hamda uning ittifoqchilari 2021-yil 11-sentabrga qadar Afg‘oniston hududidan o‘z qo‘shinlarini olib chiqib ketishi lozim. Qo‘shinlarning olib chiqib ketilishi oqibatida mamlakat hududida “Tolibon” harakati vakillarining faollashuvi kuzatilmoqda. May oyidan beri “Tolibon” hujum operatsiyalarini amalga oshirib, hukumat qo‘shinlariga keskin zarbalar bermoqda.
Ma’lumotlarga ko‘ra, ayni vaqtda “Tolibon” mamlakatning 370 ta hududidan 110 tasini o‘z nazoratiga olgan. Afg‘oniston hukumati qo‘shinlarining harbiylar guruhi “Tolibon” bilan keskin to‘qnashuvlardan keyin Tojikiston va O‘zbekiston hududiga qochib o‘tmoqda. 5-iyul kuni Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgan.
Avval Rossiya Afg‘onistondagi vaziyat tufayli Tojikistondagi harbiy bazasidan foydalanishga tayyorligi, Turkmaniston Afg‘oniston bilan chegara hududidagi harbiy safarbarlikni kuchaytirishi, Putin afg‘on-tojik chegarasidagi vaziyatning keskinlashuvi munosabati bilan Tojikistonga yordam berishni va’da qilgani haqida xabarlar berilgan.
Izoh (0)