Тожикистон Афғонистон билан чегарага қўшимча қўшинларни юборади, чегарани янада мустаҳкамлаш учун захирадаги яна 20 минг ҳарбийни сафарбар қилади. Бу ҳақда Тожикистоннинг Коллектив хавфсизлик тўғрисидаги шартнома ташкилоти (КХШТ)даги доимий ва мухтор вакили Ҳасан Султонов маълум қилди, деб ёзади «Интерфакс».
Султонов 7 июль куни КХШТ доимий кенгаши мажлисида айтиб ўтишича, Афғонистон билан чегарадаги мураккаб вазият туфайли 5 июль куни Тожикистон Хавфсизлик кенгашининг Республика президенти Эмомали Раҳмон раислигида мажлиси бўлиб ўтган.
Раҳмон Хавфсизлик кенгаши аъзоларига, куч тузилмалари ва ҳуқуқ-тартибот органлари раҳбарларига «Тожикистон ва Афғонистон чегарасида давлат ва миллат хавфсизлигини таъминлаш бўйича муайян чоралар кўриш»ни топширган.
Унинг таъкидлашича, шунингдек, «давлат чегарасида қонун бузилишларининг олдини олиш, хусусан, трансмиллий жиноятчилик, терроризм, экстремизм ва наркотикларнинг ноқонуний айланмасига йўл қўймасликка алоҳида эътибор қаратиш» буюрилган.
Ҳасан Султонов Тожикистон қўшни Афғонистон билан чегарани ҳимоя қилишда ёрдам олишни мўлжаллаётганини қайд этди.
У тожик-афғон чегарасини мустаҳкамлаш тўғрисидаги 2013 йилги шартнома борлигини эслатиб ўтди. «Ташкилотга аъзо давлатларни ушбу ҳужжатни тўлиқ амалга оширишга ўз ҳиссасини қўшишга чақиришни истардим», — деди у.
Тожикистон вакили, шунингдек, Афғонистондан халқаро коалиция асосий кучлари чиқариб кетилганидан кейин у ерда нималар юз бераётгани ҳақида гапириб берди. 21 июндан чегара ҳудудида Афғонистон ҳукумат армияси ва «Толибон» ҳаракати ўртасида жанглар бўлиб ўтган. Шу ҳафта экстремистлар Тожикистон билан чегарадош Бадахшон вилояти ҳудудидаги қишлоқларни эгаллаб олган. Натижада «Толибон» энди чегаранинг 900 километрдан ортиқ қисмини назорат қилмоқда (чегаранинг жами узунлиги 1340 км).
5 июль куни Тожикистон президенти Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этгани,Владимир Путин Тожикистонга Афғонистон билан чегарадаги вазиятнинг кескинлашуви муносабати билан ёрдам беришни ваъда қилгани, Ўзбекистон Президенти Шавкат Мирзиёев 5 июль куни Владимир Путин билан телефон орқали мулоқот қилиб, суҳбат давомида Афғонистоннинг шимолий ҳудудларидаги аҳвол ёмонлашиши фонида Марказий Осиёдаги вазиятнинг ривожига алоҳида тўхталиб ўтгани ҳақида хабарлар берилганди.
Шунингдек, Туркманистон Афғонистон билан чегара ҳудудидаги ҳарбий сафарбарликни кучайтиради.
Изоҳ (0)