Putin afg‘on-tojik chegarasidagi vaziyatning keskinlashuvi munosabati bilan Tojikistonga yordam berishni va’da qildi

Rossiya prezidenti Vladimir Putin Tojikistonga Afg‘oniston bilan chegaradagi vaziyatning keskinlashuvi munosabati bilan yordam berishni va’da qildi, deb yozadi Meduza.

Kreml veb-saytidagi bayonotga ko‘ra, Tojikiston prezidenti Emomali Rahmon bilan telefon orqali suhbatda Putin “Tojikistonga ham ikki tomonlama, ham Kollektiv xavfsizlik shartnomasi tashkiloti doirasida zarur ko‘mak berishga tayyorligini tasdiqladi”.

O‘zbekiston Prezidenti Shavkat Mirziyoyev 5-iyul kuni Rossiya prezidenti Vladimir Putin bilan telefon orqali muloqot qildi. Suhbat davomida prezidentlar Afg‘onistonning shimoliy hududlaridagi ahvol yomonlashishi munosabati bilan Markaziy Osiyodagi vaziyatning rivojiga alohida to‘xtalib o‘tdi.

O‘sha kuni Emomali Rahmon tojik-afg‘on chegarasidagi vaziyatning keskinlashuvi masalasida Xavfsizlik kengashining favqulodda yig‘ilishini o‘tkazdi. Yig‘ilish yakunida prezident mudofaa vaziriga 20 ming nafar harbiy rezerv vakillarini Tojikiston hamda Afg‘oniston chegarasini mustahkamlashga yuborishni tayinladi.

2001-yildan buyon Afg‘onistonda bo‘lib turgan AQSh qo‘shinlari chiqib keta boshlagach, “Tolibon” tezda Kobuldagi rasmiy hukumat nazorati ostidagi hududlarni egallay boshladi va ko‘pincha bunga qarshiliksiz erishmoqda.

“Tolibon” bilan to‘qnashuvlardan keyin aksariyat hollarda hukumat kuchlarining harbiy xizmatchilari Tojikiston hududiga chekinmoqda. Xususan, 5-iyul kuni 1000 dan ortiq afg‘on askarlari chegarani kesib o‘tdi. Shuningdek, 3-iyul kuni “Tolibon” bilan to‘qnashuvdan keyin 300 dan ortiq afg‘onistonlik harbiylar Tojikistonga chekingan.

Tojikiston hududida 201-Rossiya harbiy bazasi joylashgan, baza Rossiyaning o‘z chegaralaridan tashqaridagi eng yirik harbiy obyekti. U 2004-yilda tashkil qilingan, ikki mamlakat kelishuvi bo‘yicha uni joylashtirish muddati 2042-yilgacha uzaytirilgan. Kollektiv xavfsizlik shartnomasi tashkilotiga a’zo davlatlar (Rossiya, Tojikiston Qozog‘iston, Belarus, Armaniston va Qirg‘iziston) ushbu mamlakatlardan birining xavfsizligiga tahdid tug‘ilganda harbiy yordam ko‘rsatishni o‘z zimmasiga oladi.