Buxoro viloyatining Romitan tumanidagi avtomobil yo‘lida qarovsiz qoldirilgan 5 yoshli qizaloq YPX inspektori yordami bilan uyiga qaytarildi. Bu haqda “Daryo”ga viloyat IIB YHXB axborot xizmati rahbari Ulug‘bek Shukrullayev ma’lum qildi.
Ta’kidlanishicha, 2021-yilning 28-may kuni ertalab taxminan soat 07:30 da viloyat IIB YHXB yo‘l patrul xizmati otryadi 2-safarbarlik guruhi inspektori, safdor Suhrob Ergashev Romitan tumanidan o‘tuvchi xalqaro ahamiyatga ega A-380 G‘uzor—Buxoro—Nukus—Beyneu avtomobil yo‘lining 237-kilometrida xizmat avtomashinasida o‘tib ketayotgan bo‘lgan. U katta va serqatnov yo‘lda qarovsiz yurgan qizaloqni ko‘rib qolgan va zudlik bilan qizaloqning yoniga yetib borgan. YPX inspektori qizaloqni yaqin hududdagi Chilong‘u aholi yashash punktiga olib borgan.
Ma’lum bo‘lishicha, hovli va tomorqa ishlari bilan band bo‘lgan 5 yoshli qizaloqning onasi G.N. qizining hovlidan chiqib ketganidan ham bexabar bo‘lgan. Farzandini onasiga sog‘-salomat yetkazgan inspektor fuqaro G.N. va uning oila a’zolariga katta xalqaro yo‘lga yaqin manzilda yashab kelishayotganini aytib, bolalar hayoti va sog‘ligi uchun mas’uliyatni oshirish zarurligini ta’kidlagan. Xonadon egalarini xushyorlikka chaqirgan.
Izoh (0)