Бухоро вилоятининг Ромитан туманидаги автомобиль йўлида қаровсиз қолдирилган 5 ёшли қизалоқ ЙПХ инспектори ёрдами билан уйига қайтарилди. Бу ҳақда «Дарё»га вилоят ИИБ ЙҲХБ ахборот хизмати раҳбари Улуғбек Шукруллаев маълум қилди.
Таъкидланишича, 2021 йилнинг 28 май куни эрталаб тахминан соат 07:30 да вилоят ИИБ ЙҲХБ йўл патруль хизмати отряди 2-сафарбарлик гуруҳи инспектори, сафдор Суҳроб Эргашев Ромитан туманидан ўтувчи халқаро аҳамиятга эга А-380 Ғузор—Бухоро—Нукус—Бейнеу автомобиль йўлининг 237-километрида хизмат автомашинасида ўтиб кетаётган бўлган. У катта ва серқатнов йўлда қаровсиз юрган қизалоқни кўриб қолган ва зудлик билан қизалоқнинг ёнига етиб борган. ЙПХ инспектори қизалоқни яқин ҳудуддаги Чилонғу аҳоли яшаш пунктига олиб борган.
Маълум бўлишича, ҳовли ва томорқа ишлари билан банд бўлган 5 ёшли қизалоқнинг онаси Г.Н. қизининг ҳовлидан чиқиб кетганидан ҳам бехабар бўлган. Фарзандини онасига соғ-саломат етказган инспектор фуқаро Г.Н. ва унинг оила аъзоларига катта халқаро йўлга яқин манзилда яшаб келишаётганини айтиб, болалар ҳаёти ва соғлиги учун масъулиятни ошириш зарурлигини таъкидлаган. Хонадон эгаларини хушёрликка чақирган.
Изоҳ (0)