“O‘zbekneftgaz” matbuot xizmati xabariga ko‘ra, Talimarjon IESda avariyaviy holat yuz bergani, shu sabab “O‘zbekneftgaz” korxonalari faoliyati vaqtincha to‘xtab qolgani xabar berilgan. “Issiqlik elektr stansiyalari” axborot xizmati mazkur holatni rad etdi.
“Issiqlik elektr stansiyalari” axborot xizmatining yozishicha, 4-iyun kuni soat 22:17 da Talimarjon IESdan 18,5 kilometr uzoqlikdagi “O‘zbekneftgaz” tizimidagi “Sho‘rtan” podstansiyasidan chiquvchi 220 kVli elektr uzatish tarmog‘ida uzoq muddatli (4,7 sekund) qisqa tutashuv yuzaga kelgan. Shu sabab 220 kV kuchlanishli tarmoq kuchlanishi 35 kVgacha kamayib, Tolimarjon IESning 1-sonli energobloki hamda 2-sonli bug‘-gaz qurilmasining avtomatik himoya tizimi muvaffaqiyatli ishga tushgan.
“ ‘Sho‘rtan’ podstansiyasidan chiquvchi 220 kVli elektr uzatish liniyasida qisqa tutashuv sodir bo‘lishiga avto-texnikalarning 220 kVli elektr uzatish tarmog‘iga ruxsat etilmagan masofagacha yaqinlashishi oqibatida tarmoqdan yerga uzoq muddatli qisqa tutashuv sodir bo‘lgan. Agar Talimarjon IESdagi energobloklarning avtomatik himoya tizimi yuz bergan ushbu tutashuv natijasida energobloklarni to‘xtatmaganda, bu elektr energiyasi uzatish tizimida juda katta miqdordagi texnikaviy va moliyaviy talafotlarga sabab bo‘lishi mumkin edi”, — deyiladi rasmiy bayonotda.Ta’kidlanishicha, voqea yuz bergan vaqtning o‘zida tizim ishini tiklash uchun barcha imkoniyatlar ishga solingan va Talimarjon IES 2-sonli bug‘-gaz qurilmasi 5-iyun soat 00:58 da ishga tushirilgan.
“Bugun soat 10:14 da stansiyadagi 1-sonli energoblok qaytib ishga qo‘yildi va ayni paytda to‘liq quvvatda ishlamoqda. Talimarjon IES ishlab chiqarayotgan elektr energiyasining o‘rnini qoplash uchun Toshkent IES, Navoiy IES va Sirdaryo IESlardagi zahiradagi energobloklar qo‘shimcha quvvatlar yetkazib berish uchun energotizimga ulandi. Yuqoridagi holatni inobatga olib OAV va ayrim ijtimoiy tarmoq vakillaridan ‘Issiqlik elektr stansiyalari’ faoliyatiga bog‘liq ma’lumotlarni tarqatishda, axborotlarning ishonchliligini ta’minlashda, xususan jamoatchilikni chalg‘itishning oldini olish maqsadida yuz bergan holatlar bo‘yicha ‘Issiqlik elektr stansiyalari’ matbuot xizmatiga murojaat qilishlarini so‘raymiz”, — deyiladi “Issiqlik elektr stansiyalari” axborot xizmati rasmiy saytida.
Izoh (0)