Toshkent tumanida 19 yoshli yigit transformator toki urishi oqibatida vafot etgani to‘g‘risida xabar berilgandi. Hozirda ushbu vaziyat jiddiy o‘rganilmoqda va ushbu holat tegishli mutasaddi xodimlar nazoratiga olingan, deya xabar bermoqda “Hududiy elektr tarmoqlari” aksionerlik jamiyati.
O‘rganishlar davomida aniqlanishicha, mazkur baxtsiz hodisa 2021-yilning 6-may kuni soat 11:00 atrofida Toshkent viloyatining Toshkent tumani, “Chuvalachi” MFYda sodir bo‘lgan. Gulyashnar ko‘chasi, 110-uy manzilida yashovchi 2002-yilda tavallud topgan X.T. yuqorida qayd etilgan vaqtda 110/35/10 kilovatt “Kensoy” podstansiyasidan chiquvchi 10 kilovatt kuchlanishli fider “Najmiddin”ga ulangan GKTP rusumli 231-sonli transformator punkti yonidagi temir panjarani ushlashi oqibatida voqea joyida vafot etgan.
Mazkur holat bo‘yicha Toshkent tuman prokuraturasi tomonidan 2021-yil 24-may sanasi bilan 15/110-2021 sonli xizmat tekshiruvi o‘tkazish bo‘yicha “Toshkent HETK”ga so‘rovnoma yuborilgan bo‘lib, “Toshkent HETK”ning 2021-yil 31-maydagi 207-son buyrug‘i asosida ichki tekshiruv komissiyasi tashkil etilgan.
Hozirda mazkur holat bo‘yicha Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan bo‘lib, dastlabki tergov harakatlari olib borilmoqda.
“Shu o‘rinda ushbu baxtsiz hodisa sodir bo‘lgan vaqtdan qariyb bir oy o‘tib ijtimoiy tarmoqlarda tarqalgan mazkur videolavha haqiqiyligi, ya’ni u aynan shu yerda faoliyat olib borayotgan do‘kon kamerasiga go‘yoki muhrlangani, biroq kamera do‘konga emas, aynan voqea sodir bo‘lgan joyga qaratilgani, bundan tashqari kamera obyektivida sana, vaqt aks etmayotgani kabi qator savollarni tug‘dirmoqda.
Surishtiruv jarayonlari davom etayotgan paytda jamoatchilikdan yakuniy xulosa chiqarmasliklarini, shu bilan birga elektr energiyasi muhofaza hududlari, kuchlanish mavjud joylarda ehtiyotkor bo‘lishlarini, nosoz elektr qurilmalariga duch kelgan holda esa darhol 1154 qisqa raqami orqali “Hududiy elektr tarmoqlari”ning Call-markaziga yoki Telegram messenjeridagi ‘Hududiy elektr tarmoqlari’ AJ bilan muloqot” kanal administratoriga (@HET_admin) murojaat qilishlarini so‘rab qolamiz.
Shuningdek, bunday hollarda elektr ta’minoti korxonalarining dispetcherlik xizmatlariga xabar berish maqsadga muvofiqligi hamda mavjud elektr uzatish tarmoqlari va uskunalarning kuchlanish ostida bo‘lgan tok o‘tkazuvchi qismlarga mumkin bo‘lmagan masofaga yaqinlashmaslik kerakligini yana bir bor eslatib o‘tamiz”, – deyiladi xabarda.
Bundan avval Toshkentda poyezd ustida selfi qilmoqchi bo‘lgan 18 yoshli yigitni 27 ming voltli tok urgani hamda Toshkentda 8 yoshli qizaloq elektr toki urishi oqibatida vafot etgani haqida xabar berilgandi.
Izoh (0)