Turkmaniston prezidenti Gurbanguli Berdimuhamedov 24-may kuni Ashxobodning 140 yilligini nishonlashga bag‘ishlangan Vazirlar Mahkamasining kengaytirilgan yig‘ilishini o‘tkazdi. Bu haqda Turkmaniston davlat axborot agentligiga tayanib “Xronika Turkmenistana” xabar berdi.
Xabarga ko‘ra, yig‘ilishda bosh vazirning transport, kommunikatsiya va sanoat masalalari bo‘yicha o‘rinbosari Bayramgeldi Ovezov poytaxtda ham, shaharlararo yo‘nalishlarda ham harakatlanadigan yangi shahar avtobuslari va taksilari sotib olingani haqida hisobot berdi.
So‘ngra Majlis raisi Gulshat Mamadova parlament qaroriga binoan Gurbanguli Berdimuhamedovga “Ashxobod shahrining faxriy fuqarosi” unvoni berilganini aytdi.
Ta’kidlanishicha, davlat rahbari Ashxobod shahrining siyosiy, iqtisodiy va madaniy rivojlanishidagi ulkan xizmatlari va shaxsiy hissasi uchun, milliy me’morchilikning yangi darajasiga erishish, zamonaviy shahar infratuzilmasini shakllantirish, shuningdek, Turkmaniston poytaxti tashkil etilganining 140 yilligi munosabati bilan ushbu unvonga sazovor bo‘ldi.
O‘z navbatida, prezident Mammedovaga faxriy turkman fuqarolariga mukofotlarni tantanali ravishda topshirish haqida ko‘rsatma berdi. O‘sha kuni Ashxobodning ijtimoiy-iqtisodiy rivojlanishiga o‘zining ulkan hissasini qo‘shgan xalq xo‘jaligining turli sohalaridagi eng yaxshi ishchilariga, ishlab chiqarish rahbarlariga, vazirliklar va idoralar, tashkilotlar xodimlariga, ijodkorlarga mukofotlar topshirildi.
So‘ng davlat rahbari Ashxobod shahar turar-joy majmuasi masalalari to‘g‘risida farmon imzoladi, unga binoan ushbu majmuani uyushgan ravishda qurish bo‘yicha Qurilish va arxitektura vazirligi huzurida idoralararo komissiya tashkil etiladi. Shuningdek, eng yaxshi etrap uchun tanlov e’lon qilish to‘g‘risida buyruq berildi.
Avvalroq Turkmaniston parlamenti “Xizmat ko‘rsatgan itboqar” va “Xalq itboqari” faxriy unvonlarini ta’sis etish to‘g‘risidagi qonun loyihalarini qabul qilgani haqida xabar berilgandi. 21-aprel kuni Gurbanguli Berdimuhamedov o‘z o‘g‘lini “Turkmanistonda xizmat ko‘rsatgan itboqar” unvoni bilan taqdirladi.
Izoh (0)