Falastindagi HAMAS harakatining Minsk aeroportiga favqulodda qo‘ngan Ryanair samolyoti bortida bomba borligi haqidagi xabarga hech qanday aloqasi yo‘q. Bu haqda HAMAS vakili Fauzi Barxum Reuters agentligiga ma’lum qildi.
“Biz bunday usullardan foydalanmaymiz”, — degan Barxum.
Uning fikriga ko‘ra, HAMAS nomidan samolyotni minalashtirish haqidagi xabar harakatni “yomonotliq qilishga intilayotganlar”, shuningdek “Falastin xalqi va ularning qonuniy kurashiga hamdardlikni susaytirayotganlar” tomonidan yuborilgan.
23-may kuni Afinadan Vilnyusga yo‘l olgan Ryanair aviakompaniyasi samolyoti Minsk aeroportiga shoshilinch qo‘ngan edi. Belarus Transport va kommunikatsiyalar vazirligining aviatsiya departamenti direktori Artyom Sikorskiy Minsk aeroporti elektron pochtasiga HAMAS nomidan samolyot minalashtirilgani haqida xabar kelganini aytgan va uni o‘qib eshittirgan. Sikorskiyning aytishicha, Belarus dispetcherlari Ryanair samolyoti ekipajiga ushbu xavf haqida xabar bergan, shundan keyin ekipaj Minsk xalqaro aeroportiga qo‘nish haqida qaror qabul qilgan.
Ryanair samolyoti yo‘lovchilari orasida Nexta muxolifatchi Telegram kanali sobiq bosh muharriri Roman Protasevich bor edi, Belarusda unga qarshi bir qator jinoyat ishlari qo‘zg‘atilgan. Protasevich va uning sevgilisi — Rossiya fuqarosi Sofya Sapega aeroportda qo‘lga olingan.
Ryanair samolyotining favqulodda qo‘ndirilishidan so‘ng, Yevropa mamlakatlari Belarusdan parvozlarni qabul qilishni rad eta boshladi, Yevropa aviakompaniyalari esa Belarus havo hududini kesib o‘tishdan bosh tortmoqda.
Mavzuga doir:
- Bayden Ryanair samolyotining Minskka qo‘ndirilishi yuzasidan javob choralarini ishlab chiqishni buyurdi
- Litva Belarus havo hududidan o‘tadigan reyslarni qabul qilmaydi va jo‘natmaydi. Mamlakat o‘z fuqarolaridan Belarusni tark etishni so‘radi
- Sakkizta mamlakat Belarus osmonidan uchib o‘tishni taqiqlashni talab qildi
Izoh (0)