Туркманистон президенти Гурбангули Бердимуҳамедов 24 май куни Ашхободнинг 140 йиллигини нишонлашга бағишланган Вазирлар Маҳкамасининг кенгайтирилган йиғилишини ўтказди. Бу ҳақда Туркманистон давлат ахборот агентлигига таяниб «Хроника Туркменистана» хабар берди.
Хабарга кўра, йиғилишда бош вазирнинг транспорт, коммуникация ва саноат масалалари бўйича ўринбосари Байрамгелди Овезов пойтахтда ҳам, шаҳарлараро йўналишларда ҳам ҳаракатланадиган янги шаҳар автобуслари ва таксилари сотиб олингани ҳақида ҳисобот берди.
Сўнгра Мажлис раиси Гулшат Мамадова парламент қарорига биноан Гурбангули Бердимуҳамедовга «Ашхобод шаҳрининг фахрий фуқароси» унвони берилганини айтди.
Таъкидланишича, давлат раҳбари Ашхобод шаҳрининг сиёсий, иқтисодий ва маданий ривожланишидаги улкан хизматлари ва шахсий ҳиссаси учун, миллий меъморчиликнинг янги даражасига эришиш, замонавий шаҳар инфратузилмасини шакллантириш, шунингдек, Туркманистон пойтахти ташкил этилганининг 140 йиллиги муносабати билан ушбу унвонга сазовор бўлди.
Ўз навбатида, президент Маммедовага фахрий туркман фуқароларига мукофотларни тантанали равишда топшириш ҳақида кўрсатма берди. Ўша куни Ашхободнинг ижтимоий-иқтисодий ривожланишига ўзининг улкан ҳиссасини қўшган халқ хўжалигининг турли соҳаларидаги энг яхши ишчиларига, ишлаб чиқариш раҳбарларига, вазирликлар ва идоралар, ташкилотлар ходимларига, ижодкорларга мукофотлар топширилди.
Сўнг давлат раҳбари Ашхобод шаҳар турар-жой мажмуаси масалалари тўғрисида фармон имзолади, унга биноан ушбу мажмуани уюшган равишда қуриш бўйича Қурилиш ва архитектура вазирлиги ҳузурида идоралараро комиссия ташкил этилади. Шунингдек, энг яхши этрап учун танлов эълон қилиш тўғрисида буйруқ берилди.
Аввалроқ Туркманистон парламенти «Хизмат кўрсатган итбоқар» ва «Халқ итбоқари» фахрий унвонларини таъсис этиш тўғрисидаги қонун лойиҳаларини қабул қилгани ҳақида хабар берилганди. 21 апрель куни Гурбангули Бердимуҳамедов ўз ўғлини «Туркманистонда хизмат кўрсатган итбоқар» унвони билан тақдирлади.
Изоҳ (0)