Ryanair reysining Minskka majburiy qo‘ndirilishidan so‘ng qaysi davlatlar va aviakompaniyalar Belarus havo maydonini boykot qilmoqda?

Afinadan Vilnyusga yo‘l olgan Irlandiyaning Ryanair aviakompaniyasiga tegishli samolyotni Minskka majburiy qo‘ndirish bilan bog‘liq voqeadan so‘ng Yevropa mamlakatlari aviakompaniyalarga Belarus havo hududidan foydalanishni taqiqladi. Ko‘plab samolyotlar allaqachon Belarus havo hududini chetlab o‘tishni boshladi, deb yozadi “RBK”.

Yevropa Ittifoqi sammiti

Yevropa Ittifoqi mamlakatlari rahbarlari uchrashuvidan so‘ng Belarus aviakompaniyalarining Yevropa Ittifoqi bo‘ylab parvozlarini taqiqlash to‘g‘risida siyosiy qaror qabul qilindi. Qaror tegishli vazirlarni o‘z ichiga olgan Yevropa Ittifoqi Kengashi tomonidan tasdiqlanishi kerak. Shuningdek, mamlakatlar rahbarlari Yevropa aviakompaniyalariga Belarus hududi bo‘ylab parvoz qilmaslikni tavsiya qildi.

Buyuk Britaniya

Buyuk Britaniya transport vaziri Grant Shepps Twitter’da mamlakat Belarusga tegishli “Belavia” aviakompaniyasining Buyuk Britaniyaga parvozlari uchun litsenziyani to‘xtatgani haqida e’lon qildi. Shuningdek, Britaniya hukumati aviakompaniyalardan Belarus havo hududidan foydalanmaslikni talab qildi.

Litva

Litva transport vaziri Marius Skuodisning aytishicha, 25-may tunidan boshlab mamlakatga kelgan yoki u yerdan jo‘nayotgan barcha samolyotlar Belarus havo hududiga kirmasligi lozim.

Fransiya

Xavfsizlik nuqtayi-nazaridan Fransiya rasmiylari o‘zlarining aviakompaniyalariga Belarus ustidan uchib o‘tmaslikni maslahat berdi. Transport vazirligi huzuridagi davlat kotibi Jan-Batist Jebbarining so‘zlariga ko‘ra, “Belavia” parvozlariga ruxsat ham to‘xtatilgan. Air France kompaniyasi Belarus havo hududida parvozlarni to‘xtatdi. “Yo‘nalishda bo‘lgan samolyotlar uchun parvoz rejasi o‘zgartiriladi”, — dedi aviakompaniya.

Polsha

Polsha Tashqi ishlar vazirligi Belarus ustidan o‘tishni taqiqlash to‘g‘risida murojaat qildi. Asosiy aviakompaniya LOT Belarus havo hududidan foydalanmaslikka qaror qildi.

Ukraina

Milliy xavfsizlik va mudofaa kengashi yig‘ilishi paytida Ukraina prezidenti Vladimir Zelenskiy hukumatga Ukraina va Belarus o‘rtasida to‘g‘ridan to‘g‘ri parvozlarni to‘xtatish to‘g‘risidagi qarorni ishlab chiqish, shuningdek, Belarus havo maydoni orqali Ukrainaga parvozlarni yopish to‘g‘risida ko‘rsatma berdi. Mamlakatlar o‘rtasidagi havo qatnovi 26-may tunidan boshlab to‘xtatiladi, dedi Ukraina bosh vaziri Denis Shmigal.

Shvetsiya

Shvetsiya transport ma’muriyati mahalliy aviakompaniyalarga vaziyat barqarorlashguncha Belarus havo hududida parvozlarni to‘xtatishni tavsiya etishga qaror qildi. Bu haqda 24-may kuni departament tomonidan e’lon qilingan bayonotda aytilgan. Shundan so‘ng Skandinaviyaning SAS aviakompaniyasi o‘z samolyotlari Belarus havo hududiga kirmasligini e’lon qildi.

Niderlandiya

Niderlandiya bosh vaziri Mark Ryutte Minskdagi voqeadan keyin KLM milliy aviatashuvchisi Belarus havo hududi orqali parvoz qilmasligi kerakligini aytdi. Keyinchalik KLM Belarusga parvozlarni to‘xtatish to‘g‘risidagi qarorni e’lon qildi.

Belgiya

Belgiya bosh vaziri Aleksandr de Kroo o‘zining Twitter’ida Yevropa Ittifoqi Belarusga qarshi yangi sanksiyalarni, shu jumladan “Belavia” samolyotlarining Yevropa Ittifoqi mamlakatlari aeroportlariga qo‘nishini taqiqlashni muhokama qilishi lozimligini aytdi.

Germaniya

Germaniya kansleri Angela Merkel Belarusga qarshi qo‘shimcha sanksiyalar kiritdi. U boshqa masalalar qatori “Belavia” aviakompaniyasining parvozlariga taqiq qo‘yilishini ham istisno qilmadi. Merkelning nutqidan ko‘p o‘tmay, Germaniyaning Lufthansa aviakompaniyasi Minskka parvozlarni to‘xtatish va Belarus havo hududiga kirishni rad etish to‘g‘risida qaror qabul qilganini e’lon qildi.

Finlyandiya

24-kuni Bryusselda bo‘lib o‘tgan Yevropa Ittifoqi davlatlari rahbarlarining sammitiga kelgan Finlyandiya hukumati rahbari Sanna Marin ham Fuqaro aviatsiyasi xalqaro tashkiloti tomonidan olib borilgan tekshiruvlar oxiriga qadar Belarus havo hududidan foydalanishni taqiqlash to‘g‘risida e’lon qildi. Finlyandiyaning Finnair davlat aviakompaniyasi 25-may kuni Belarus havo hududini chetlab o‘tishni rejalashtirayotganini ma’lum qildi. Ularning ta’kidlashicha, bu parvoz ko‘p vaqtni oladi.

Aviakompaniyalar

Latviyaning AirBaltic kompaniyasi o‘zining samolyotlari uchun Belarus havo hududidan foydalanishni bekor qilgani haqida e’lon qilgan birinchi kompaniya bo‘ldi. Austrian Airlines aviakompaniyasining samolyoti 24-may kuni Venadan Moskvaga Belarus orqali emas, balki Ukraina orqali uchib keldi. Kompaniya vaziyatning rivojlanishi kutilayotganini aytdi.

Vengriyaning WizzAir aviakompaniyasi o‘z samolyotlari Belarus havo hududiga kirmasligini ma’lum qildi.

Kiprda ro‘yxatdan o‘tgan Avia Solutions kompaniyasi Litvadagi samolyotlari Belarus hududi bo‘ylab uchib o‘tmasligini va’da qildi.

Rossiyaning Utair aviakompaniyasi 23-may kuni Moskvadan Kaliningradga Belarusni chetlab parvoz qildi. Keyinchalik kompaniya buni “yoqilg‘ini tejash” bilan izohladi, ularning so‘zlariga ko‘ra, qaytish reysi Belarus hududi bo‘ylab amalga oshirilgan.