Buyuk Britaniya bosh vaziri Belarusni Roman Protasevichni zudlik bilan ozod qilishga chaqirdi

Buyuk Britaniya bosh vaziri Boris Jonson Belarus rahbariyatini Minskdagi Ryanair samolyotining favqulodda qo‘nishi bilan bog‘liq hodisa oqibatlari to‘g‘risida ogohlantirdi deb yozadi “TASS”.

Twitter’dagi sahifasiga joylangan xabarida Jonson, shuningdek, Minskda hibsga olingan Nexta Telegram kanali asoschisi Roman Protasevichni zudlik bilan ozod qilishga chaqirdi.

“Roman Protasevich ishtirokidagi video chuqur tashvishga solmoqda”, — deb yozgan Jonson. — “Jurnalist va so‘z erkinligiga chinakam ishonadigan inson sifatida men uni zudlik bilan ozod qilishga chaqiraman. Belarusning harakatlari ma’lum bir oqibatlarga olib keladi”.

24-may kuni Buyuk Britaniya tashqi ishlar vaziri Dominik Raab Britaniya hukumati chet ellik hamkorlar bilan Ryanair voqeasi va Protasevich hibsga olinganidan keyin Belarusga qarshi qo‘llanilishi mumkin bo‘lgan keng ko‘lamli choralarni muhokama qilayotganini aytdi.

Buyuk Britaniya Belarusga tegishli Belavia aviakompaniyasining Buyuk Britaniyaga parvozlarni amalga oshirish uchun litsenziyasini to‘xtatib qo‘ydi. Bundan tashqari, qirollikda ro‘yxatdan o‘tgan aviakompaniyalar Belarus havo hududini chetlab o‘tish bo‘yicha rasmiylardan ko‘rsatma oldi.

Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qildi. Qo‘nishdan so‘ng reysning ikki yo‘lovchisi — Roman Protasevich va Sofiya Sapega hibsga olindi.

Belarus rasmiylarining ma’lum qilishicha, Ryanair reysi bortida bomba borligi haqida Minsk aeroportiga Falastinning HAMAS harakati nomidan yuborilgan xabar kelib tushgan. HAMAS o‘zining bu xabarga aloqasi yo‘qligini aytdi.

Ryanair samolyotining favqulodda qo‘ndirilishidan so‘ng Yevropa mamlakatlari Belarusdan parvozlarni qabul qilishni rad eta boshladi, Yevropa aviakompaniyalari esa Belarus havo hududini kesib o‘tishdan bosh tortmoqda.

Belarusda Protasevichga qarshi bir nechta jinoiy ishlar, jumladan, ommaviy tartibsizliklarni tashkil qilish bo‘yicha ish qo‘zg‘atilgan. 24-may kuni Belarusning hukumatga yaqin Telegram kanali joylashtirgan videoda Protasevich aybiga iqror bo‘lganini aytgan.

2020-yil noyabrida Roman Protasevich Belarusda terrorchilik faoliyatiga aloqador jismoniy shaxslar ro‘yxatiga kiritilgan edi.