Hindiston shifokorlari koronavirusga chalingan bemorda zamburug‘ infeksiyasining uchinchi turini aniqladi. Bu haqda DNA India agentligi xabar berdi.
Sariq zamburug‘ deb ataluvchi mazkur infeksiyaga chalinish bo‘yicha birinchi holat Gaziobodda (Uttar-Pradesh shtati) qayd etilgan.
Ma’lum bo‘lishicha, 45 yoshli bemor kasalxonada bir necha hafta davomida COVID-19 bilan kurashib, kasallikdan tuzalgan edi, ammo keyin uning ahvoli yomonlashgan: yuzi shishib ketganidan erkak ko‘zlarini ocholmay qolgan, shuningdek, burundan qon ketish boshlangan.
Otolaringolog shifokor Brayya Pal Tyagining ma’lum qilishicha, kasallik alomatlari orasida holsizlik, ishtahaning pasayishi va vaznning kamayishi, jarohat o‘rnining sekin bitishi mavjud. Uning so‘zlariga ko‘ra, og‘ir holatlarda yiringlash paydo bo‘ladi.
Tyagining ta’kidlashicha, sariq zamburug‘ odatda sudralib yuruvchilarda uchraydi, shifokor bu infeksiyani odamlarda birinchi marta ko‘rayotganini aytgan Bemorning ahvolini “juda yaxshi deb bo‘lmaydi”, deya qo‘shimcha qilgan tibbiyot xodimi.
DNA India ma’lumotlariga ko‘ra, muolaja uchun bemorga amfoterisin B — zamburug‘larga qarshi dori inyeksiyasini qilish kerak.
Times of India nashrining yozishicha, mutaxassislar sariq zamburug‘ infeksiyaning qolgan ikki turiga qaraganda ancha xavfli bo‘lishi mumkinligini aytmoqda, chunki u poliorgan yetishmovchiligi va to‘qima nekrozini keltirib chiqarishi mumkin.
Hindistonda COVID-pandemiya fonida odamlarning xavfli zamburug‘larga chalinish holatlari ko‘paydi. Mamlakatda koronavirus tarqalishining ikkilamchi ta’siri sifatida paydo bo‘lgan qora zamburug‘ epidemiyasi fonida yana bir zamburug‘ kasalligi aniqlandi, u mamlakatda oq zamburug‘ deb ataladi.
Zamburug‘ kasalliklarini yuqtirish xavfi immuniteti zaif kishilarda, shuningdek, tibbiy kasalliklarga, jumladan, qandli diabetga chalingan, reanimatsiyada bo‘lgan va uzoq vaqt steroid qabul qilgan bemorlarda yuqori bo‘ladi.
Izoh (0)