Turkmanistonda mamlakat poytaxtining 140 yilligini nishonlashga faol tayyorgarlik davom etmoqda. 26-fevral kuni Vazirlar Mahkamasining majlisida prezident Gurbanguli Berdimuhamedov yana bir bor Ashxobodning yubileyiga rejalashtirilgan tantanalar masalasiga katta e’tibor qaratdi, deb yozmoqda “Xronika Turkmenistana”.
Foto: “Xronika Turkmenistana”
Bayram munosabati bilan bir qator yangi binolar ochiladi, konsert va ko‘rgazmalar tashkil etiladi, filmlar suratga olinadi va 400 ta yangi shahar avtobuslari yo‘lga qo‘yiladi. Bundan tashqari, Berdimuhamedov 25-may — Shahar kunida tug‘ilgan birinchi o‘g‘il bolaga Paytagt (Poytaxt) yoki Ashxobod ismini, qiz bolaga esa Merjen (Marjon) yoki May ismini berishni buyurdi.
“Bu poytaxtga muhabbat, uning tarixiga hurmat, xalqning baxtli hayotidan faxrlanishni anglatuvchi o‘ziga xos belgi bo‘ladi. Yangi tug‘ilgan bolalarga bunday sovg‘a hadya qilish ushbu lahzalarni ularning oilalari uchun unutilmas onga aylantiradi”, — dedi prezident.
Shuningdek, Berdimuhamedov 8-mart — Xalqaro xotin-qizlar kuni munosabati bilan o‘z nomidan Turkmaniston ayollariga 60 manatdan (davlat kursi bo‘yicha 17,1 dollar yoki “qora bozor” kursi bo‘yicha 1,9 dollar) sovg‘a qilishni buyurdi.
Pul sovg‘alarini mulkchilik shaklidan qat’i nazar, muassasa va tashkilotlarda ishlaydigan, pensiya, nafaqa va stipendiya oladigan ayollar hamda maktab o‘quvchilari va bolalar bog‘chasi tarbiyalanuvchilari oladi. Uy bekalari va yakka tartibdagi tadbirkorlarga bunday sovg‘a berilmaydi.
Ma’lumot uchun mamlakatda o‘tgan yili ham ayollarning har biriga 60 manatdan sovg‘a qilingan edi, o‘shanda bu miqdor 3 dollarga teng bo‘lgan. Keyinchalik, hukumat yakka tartibdagi tadbirkor sifatida ro‘yxatdan o‘tgan pensionerlardan sovg‘alarni qaytarishni talab qilgani ma’lum bo‘lgan.
Avvalroq Berdimuhamedov Ashxobod yubileyi va Turkmaniston mustaqilligiga tayyorgarlik ko‘rish ishlaridan norozi bo‘lgani haqida xabar berilgandi. Prezident Gurbanguli Berdimuhamedov mustaqillikning 30 yilligi va Ashxobodning 140 yilligini nishonlashning yuqori tashkiliy saviyasini ta’minlash uchun barcha choralarni ko‘rishni qat’iy talab qilgan va yaqinlashib kelayotgan tantanalar hokimiyat davrining ta’sirchan yutuqlari hamda muvaffaqiyatlarini aks ettirishi kerakligini ta’kidlagan.
Eslatib o‘tamiz, Turkmaniston poytaxtida Toshkent nomli istirohat bog‘i qurilishi, Abdulaziz Komilov Turkmaniston prezidenti Gurbanguli Berdimuhamedov bilan uchrashgani hamda Turkmaniston prezidenti o‘z o‘g‘lini bosh vazir o‘rinbosari etib tayinlagani haqida xabar berilgandi.
