O‘zbekiston terma jamoasi hujumchisi Eldor Shomurodov uchun omadli kechgan A Seriya 2020/21-yilgi mavsumi yakuniga yetdi.
2020-yilning kuzida “Jenoa” safiga borib qo‘shilgan Eldor Italiya chempionatida 8 ta gol urdi va bitta golli uzatma amalga oshirdi. “Daryo” Shomurodovning A Seriyadagi barcha gollarini yodga oladi.
Shomurodovning “Jenoa”dagi dastlabki uchta o‘yini u qadar muvaffaqiyatli chiqmadi, bu uchrashuvlarda nafaqat Eldor, balki, genuyaliklar ham raqib darvozasiga yo‘l topa olmadi. Italiyadagi debyut gol 30-noyabrga kelib yuz berdi: “Parma”ga qarshi kechgan bahsda (1:2) Eldor jamoasining yagona golini urdi, biroq bu g‘alaba uchun yetarli bo‘lmagandi.
Orada biroz uzilish yuzaga keldi va Eldor ketma-ket to‘rtta o‘yinda samarali harakat qila olmadi. 2021-yilning dastlabki o‘yinida o‘zbekistonlik futbolchi “Latsio”ga qarshi uchrashuvda (1:1) golli uzatma amalga oshirdi.
Uch kun o‘tib, Shomurodov “Sassuolo” darvozasini ishg‘ol qildi va bu golini o‘g‘li Mustafoga bag‘ishladi.
Eldor Shomurodov ilk bor o‘g‘lining suratini ommaga ko‘rsatdi (foto)
Shundan so‘ng yana biroz vaqt quruq seriya qayd etildi. Bir yarim oydan oshiq vaqtdan keyin “Jenoa” — “Verona” (2:2) uchrashuvida Eldor o‘z nomiga gol yozdirib qo‘ydi.
Biroq keyingi to‘xtalish uzoq davom etdi, Shomurodov ikki oy mobaynida golsiz seriya qayd etdi. Bu vaqtda u 9 ta o‘yin o‘tkazib, ularning birortasida samarali harakat amalga oshira olmadi. Nihoyat, aprel oxiriga kelib Eldor yana gol urishni boshladi. “Spetsiya”ga qarshi o‘yinda (2:0) zaxiradan maydonga tushgan futbolchi o‘z uslubida darvozabon bilan birga bir vaziyatga chiqib boradi va muvaffaqiyatsiz seriyasiga yakun yasaydi.
Raqamlar so‘zlaganda: Eldor Shomurodovning Italiyadagi debyut mavsumi qanday o‘tdi?
“Latsio”ga qarshi kechgan keyingi ikkinchi o‘yinda (3:4) ham Shomurodov maydonni golsiz tark etmaydi.
Keyingi ikki o‘yinni golsiz o‘tkazgan Shomurodov “Atalanta”ga qarshi kechgan qiziqarli bahsda (3:4) dublga erishdi. Bu futbolchi uchun A Seriyadagi ilk dubl bo‘lgandi.
Shomurodov so‘nggi turda ham maydonni golsiz tark etmadi. “Kalyari”ga qarshi uchrashuvda uning yagona goli “grifonlar”ga uch ochko taqdim etdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)