Ўзбекистон терма жамоаси ҳужумчиси Элдор Шомуродов учун омадли кечган А Серия 2020/21 йилги мавсуми якунига етди.
2020 йилнинг кузида «Женоа» сафига бориб қўшилган Элдор Италия чемпионатида 8 та гол урди ва битта голли узатма амалга оширди. «Дарё» Шомуродовнинг А Сериядаги барча голларини ёдга олади.
Шомуродовнинг «Женоа»даги дастлабки учта ўйини у қадар муваффақиятли чиқмади, бу учрашувларда нафақат Элдор, балки, генуяликлар ҳам рақиб дарвозасига йўл топа олмади. Италиядаги дебют гол 30 ноябрга келиб юз берди: «Парма»га қарши кечган баҳсда (1:2) Элдор жамоасининг ягона голини урди, бироқ бу ғалаба учун етарли бўлмаганди.
Орада бироз узилиш юзага келди ва Элдор кетма-кет тўртта ўйинда самарали ҳаракат қила олмади. 2021 йилнинг дастлабки ўйинида ўзбекистонлик футболчи «Лацио»га қарши учрашувда (1:1) голли узатма амалга оширди.
Уч кун ўтиб, Шомуродов «Сассуоло» дарвозасини ишғол қилди ва бу голини ўғли Мустафога бағишлади.
Элдор Шомуродов илк бор ўғлининг суратини оммага кўрсатди (фото)
Шундан сўнг яна бироз вақт қуруқ серия қайд этилди. Бир ярим ойдан ошиқ вақтдан кейин «Женоа» — «Верона» (2:2) учрашувида Элдор ўз номига гол ёздириб қўйди.
Бироқ кейинги тўхталиш узоқ давом этди, Шомуродов икки ой мобайнида голсиз серия қайд этди. Бу вақтда у 9 та ўйин ўтказиб, уларнинг бирортасида самарали ҳаракат амалга ошира олмади. Ниҳоят, апрель охирига келиб Элдор яна гол уришни бошлади. «Специя»га қарши ўйинда (2:0) захирадан майдонга тушган футболчи ўз услубида дарвозабон билан бирга бир вазиятга чиқиб боради ва муваффақиятсиз сериясига якун ясайди.
Рақамлар сўзлаганда: Элдор Шомуродовнинг Италиядаги дебют мавсуми қандай ўтди?
«Лацио»га қарши кечган кейинги иккинчи ўйинда (3:4) ҳам Шомуродов майдонни голсиз тарк этмайди.
Кейинги икки ўйинни голсиз ўтказган Шомуродов «Аталанта»га қарши кечган қизиқарли баҳсда (3:4) дублга эришди. Бу футболчи учун А Сериядаги илк дубль бўлганди.
Шомуродов сўнгги турда ҳам майдонни голсиз тарк этмади. «Кальяри»га қарши учрашувда унинг ягона голи «грифонлар»га уч очко тақдим этди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)