AQSh davlat kotibi may oyining boshida Kiyevga rasmiy tashrif bilan boradi

AQSh Davlat kotibi Entoni Blinken 5-may kuni ikki kunlik tashrif bilan Ukraina poytaxti Kiyevga boradi. Bu haqda Davlat departamentining vakili Ned Praysga tayanib “Interfaks” xabar berdi.

Praysning so‘zlariga ko‘ra, Blinken Ukraina prezidenti Vladimir Zelenskiy, tashqi ishlar vaziri Dmitriy Kuleba va boshqa amaldorlar, shuningdek, fuqarolik jamiyati vakillari bilan uchrashadi.

Uning qo‘shimcha qilishicha, davlat kotibining tashrifi “AQShning davom etayotgan Rossiya tajovuzi sharoitida Ukrainaning suvereniteti va hududiy yaxlitligini qo‘llab-quvvatlashi”ni tasdiqlaydi.

Avvalroq Kuleba Blinken bilan uchrashuv davomida islohotlar jarayonida AQShning Ukrainaga ko‘rsatishi mumkin bo‘lgan yordamini, shuningdek, qator iqtisodiy masalalar, xususan, energetika sohasini muhokama qilishni rejalashtirayotgani haqida aytgan edi.

29-aprel kuni Prays AQSh Ukraina Vazirlar Mahkamasining Kuzatuv kengashini tarqatib yuborish va “Ukraina Naftogaz” rahbariyatini almashtirish to‘g‘risidagi qaroridan xavotirda ekani haqida gapirdi.

Avvalroq Ukraina prezidenti Vladimir Zelenskiy Rossiya prezidenti Vladimir Putin bilan uchrashish uchun eng yaxshi joy Vatikan ekanini ma’lum qildi. Prezidentning izohlashicha, Muqaddas Taxt (Vatikan ma’muriyati) vositachi vazifasini bajaruvchi “global axloqiy hokimiyat”, chunki u “xolisdir va nizo tomonlarining barchasi unga ishonch bildiradi”.

20-aprel kuni Zelenskiy Putinga Ukrainaning Donbassidagi urush ketayotgan istalgan joyida uchrashishni taklif qildi. Putin bunga javoban, agar Ukraina prezidenti Donbass muammosini muhokama qilmoqchi bo‘lsa, avval u Donetsk va Lugansk Xalq Respublikalarining rahbarlari bilan uchrashishi kerakligini va shundan keyingina uchinchi tomon sifatida Rossiya rahbariyati bilan uchrashishi mumkinligini aytdi. Shuningdek, u Rossiya tomonining Ukraina bilan ikki mamlakat o‘rtasidagi munosabatlar haqida gaplashishga tayyorligini aytdi va Zelenskiyni “o‘ziga qulay bo‘lgan istalgan vaqtda” Moskvaga kelishga taklif qildi.

Kiyev Zelenskiyning Putin bilan Moskvada uchrashishini imkonsiz deb atadi.