Ukraina xavfsizlik xizmati xodimlari barcha hududlarda yuqori darajadagi shaylik holatiga o‘tdi
Ukrainaning barcha hududlarida mamlakat xavsizlik xizmati (UXX) xodimlari yuqori shaylik holatiga keltirildi, aksariyat hududlarda antiterror o‘quv mashg‘ulotlari o‘tkazilmoqda. Bu haqda UXX matbuot kotibi Artyom Dextyarenkoga tayanib, “Ukrinform” xabar berdi.
“Bugungi kunda faqat chegaraga tutash tumanlar emas, barcha hududlardagi UXX xodimlari yuqori shaylik holatiga kelirilgan. Xizmatning razvedkaga qarshi va tezkor-tergov tarkibiy qismlari kuchaytirilgan”, — dedi Dextyarenko.
Uning qo‘shimcha qilishicha, Rossiya bilan qarama-qarshiliklarning avj olishi va Moskvaning “tajovuzkor ritorikani kuchaytirishi” UXXni munosib darajada qarshi choralar ko‘rishga undaydi.
“Bugun mamlakatimiz Rossiya Federatsiyasining gibrid urushni keltirib chiqarishiga qarshi turishi lozim. Xususan, gap maxsus axborot operatsiyalari, jamiyatda vahima kayfiyatini tarqatish, norozilik aksiyalari va tartibsizliklarni qo‘zg‘atish haqida ketmoqda”, — dedi UXX matbuot kotibi.
Avvalroq Yevropa Ittifoqining tashqi ishlar va xavfsizlik siyosati bo‘yicha oliy vakili Josep Borrel Ukraina chegarasidagi Rossiya qo‘shinlarining ko‘paytirilishini “tarixdagi eng katta ko‘lamlisi” ekanini ta’kidlagan edi. Uning so‘zlariga ko‘ra, chegaraga 100 mingdan ortiq harbiy xizmatchilar, shuningdek, dala shifoxonalari joylashtirilgan.
Shu bilan birga, Kreml bu kabi xabarlarga javoban, Rossiya armiyasi mamlakat hududida zarur deb hisoblagan yo‘nalish bo‘ylab harakatlana olishini va rossiyalik harbiylarning harakati boshqa davlatlarga tahdid solmasligini ta’kidladi. Shuningdek Rossiya Tashqi ishlar vazirligining ma’lum qilishicha, Ukraina va Rossiya o‘rtasida yuzaga kelishi mumkin bo‘lgan mojaroni muhokama qilish Ukraina hukumati tarqatayotgan “navbatdagi soxta xabar namunasi” hisoblanadi.
Avvalroq Ukraina prezidenti Vladimir Zelenskiy rossiyalik hamkasbi Vladimir Putinni Donbassda uchrashishga taklif qildi. Zelenskiy o‘zining Telegram kanaliga joylashtirilgan videomurojaatida mazkur taklif bilan chiqdi.
Ma’lumot uchun, mart oyining oxirida butun dunyo Donbassdagi vaziyatning jiddiylashayotgani haqida gapira boshladi. Conflict Intelligence Team surishtiruv guruhi Rossiya qo‘shinlarining Rossiya—Ukraina chegarasi hududida to‘planishini 2014—2015-yillardan beri eng keskin ko‘rsatkich deb atadi. Kiyev o‘z chegaralari yaqinida rus qo‘shinlari to‘planganini tasdiqladi va uni “o‘z kuchini ko‘z-ko‘z qilish” deb atadi. AQSh Rossiyadan mazkur “provokatsiyalar”ga izoh berishni talab qildi.
Buyuk Britaniya esa may oyida Ukraina va NATO bo‘yicha sheriklari bilan birdamlik va ularni qo‘llab-quvvatlash ramzi sifatida mintaqada Rossiya qo‘shinlarining ko‘paytirilishi fonida Qora dengizga ikkita harbiy kema yuborishni rejalashtirmoqda.
Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytdi.
Shuningdek, Vladimir Zelenskiy Rossiyani “jilovlash”da Baydendan yordam so‘radi. Kreml esa Rossiya va Ukraina o‘rtasidagi urush ehtimolini istisno qildi.
