Butun dunyoda pandemiya boshidan buyon 150 551 424 kishi koronavirusni yuqtirib olgan. Bu haqda Jons Hopkins universiteti ma’lumotlari guvohlik bermoqda. So‘nggi uch oy ichida kasallanganlar soni 50 millionga oshgan: 100 million kishilik marradan 26-yanvar kuni o‘tilgan edi.
Infeksiyani yuqtirganlar soni bo‘yicha AQSh (32,2 million), Hindiston (18,7 million), Braziliya (14,5 million), Fransiya (5,6 million) va Turkiya (4,7 million) yetakchilik qilmoqda. Yuqori o‘nlikdan, shuningdek, Rossiya (4,7 million), Buyuk Britaniya (4,4 million), Italiya (4 million), Ispaniya (3,5 million) va Germaniya (3,3 million) ham o‘rin oldi.
Dunyo bo‘ylab koronavirus oqibatidagi o‘limlar soni esa 3 166 697 taga yetdi.
Mavzuga doir:
Xitoy, Fransiya, Ruminiya va Isroilda “hindcha” shtamm aniqlandi
Koronavirusning “hindcha” variant bilan kasallanish holatlari Ruminiya, Isroil, Fransiya va Xitoyda qayd etildi. Ruminiya Sog‘liqni saqlash vazirligi ma’lum qilishicha, mamlakatda COVID-19’ning yangi shtammini yuqtirish holati birinchi marta 26 yoshli bemorda tasdiqlangan, u Ruminiyaga bir oycha avval kirib kelgan. Shu munosabat bilan hukumat yaqinda Hindistondan kelgan quruvchilar orasida koronavirus avj olishini tekshirmoqda.Shuningdek, infeksiyaning “hindcha” variantiga chalinish bilan bog‘liq bitta holat Fransiya janubi-g‘arbidagi Lo va Garona departamentida aniqlangan. Bemor mamlakatga yaqinda Hindistondan qaytib kelgan. Hudud rahbariyati sayohatchiga o‘z-o‘zini yakkalash majburiyatini yuklab, u muloqot qilgan odamlar orasida katta ko‘lamli tekshiruv boshladi.
O‘z navbatida, Isroil SSV mamlakatda qayd etilgan “hindcha” shtamm bilan bog‘liq 41 ta holat haqida ma’lum qildi. Infeksiyani yuqtirganlarning to‘rt nafari COVID-19’ga qarshi emlangan bo‘lgan.
Yangi shtamm bilan kasallanganlarning 24 nafari yaqinda chet eldan qaytib kelgan, qolgan 17 nafari mamlakat ichida virusga chalingan.
Shuningdek, Xitoyda ham koronavirusning “hindcha” shtammiga chalinish holatlari kuzatildi. Ushbu variant biryo‘la bir nechta shaharlarda aniqlangan.
Fransiyada COVID-cheklovlarning barchasi iyun oxiriga kelib bekor qilinadi
Fransiya prezidenti Emmanuel Makron koronavirus pandemiyasi tufayli kiritilgan cheklovlarni bosqichma-bosqich bekor qilish rejasini taqdim etdi. Unga ko‘ra, cheklovlar 3-maydan 30-iyunga qadar to‘rt bosqichda olib tashlanadi.3-may kuni fuqarolarning harakatlanishi hamda boshqa hududlarga safarlarga cheklovlar bekor qilinadi. Katta sinf o‘quvchilari va talabalar qatnab o‘qishni boshlaydi.
19-maydan komendantlik soati 2 soatga qisqaradi (21:00 dan boshlanadi). Do‘konlar, muzey, teatr va kinoteatrlar, shuningdek, kafelar ayvonlari ochiladi, ammo ba’zi cheklovlar saqlanib qoladi.
9-iyundan komendantlik soati yana 2 soat orqaga suriladi (23:00 dan boshlanadi), shuningdek, ko‘ngilochar va boshqa muassasalar ochiladi.
30-iyunda esa Fransiyada komendantlik soati bekor qilinadi. Biroq o‘zi bilan sertifikat olib yurish majburiyati saqlanib qoladi.
Shuningdek:- Jahon sog‘liqni saqlash tashkiloti (JSST) Yevropani koronavirus cheklovlarini shoshma-shosharlik bilan bekor qilish oqibatlari haqida ogohlantirdi. JSSTning Yevropa bo‘linmasi rahbari Xans Klyugening so‘zlariga ko‘ra, Yevropaning ko‘plab mamlakatlari shu hafta cheklovlarni yumshatishni boshlashni rejalashtirmoqda, vaholanki, yangi holatlarning o‘sishi endigina pasayishni boshlagan. “CHeklov choralarining juda tez bekor qilinishi har qanday mamlakatda kuchli bo‘ronga olib kelishi mumkin”, — dedi u.
- JSST rahbari Tedros Gebreyesusning ma’lum qilishicha, ayni paytgacha dunyoda 1 milliarddan ortiq dozada koronavirusga qarshi vaksina bilan emlangan, ammo shularning 82 foizi daromadi yuqori yoki o‘rtachadan balandroq bo‘lgan mamlakatlarda qabul qilingan, 0,3 foizi esa daromad darajasi past bo‘lgan mamlakatlarda emlangan. Gebreyesus COVID-19’ga qarshi vaksina taqsimotidagi tengsizlikni pandemiyaning bosh muammolaridan biri deb atadi.
Izoh (0)