АҚШ Давлат котиби Энтони Блинкен 5 май куни икки кунлик ташриф билан Украина пойтахти Киевга боради. Бу ҳақда Давлат департаментининг вакили Нед Прайсга таяниб «Интерфакс» хабар берди.
Прайснинг сўзларига кўра, Блинкен Украина президенти Владимир Зеленский, ташқи ишлар вазири Дмитрий Кулеба ва бошқа амалдорлар, шунингдек, фуқаролик жамияти вакиллари билан учрашади.
Унинг қўшимча қилишича, давлат котибининг ташрифи «АҚШнинг давом этаётган Россия тажовузи шароитида Украинанинг суверенитети ва ҳудудий яхлитлигини қўллаб-қувватлаши»ни тасдиқлайди.
Аввалроқ Кулеба Блинкен билан учрашув давомида ислоҳотлар жараёнида АҚШнинг Украинага кўрсатиши мумкин бўлган ёрдамини, шунингдек, қатор иқтисодий масалалар, хусусан, энергетика соҳасини муҳокама қилишни режалаштираётгани ҳақида айтган эди.
29 апрель куни Прайс АҚШ Украина Вазирлар Маҳкамасининг Кузатув кенгашини тарқатиб юбориш ва «Украина Нафтогаз» раҳбариятини алмаштириш тўғрисидаги қароридан хавотирда экани ҳақида гапирди.
Аввалроқ Украина президенти Владимир Зеленский Россия президенти Владимир Путин билан учрашиш учун энг яхши жой Ватикан эканини маълум қилди. Президентнинг изоҳлашича, Муқаддас Тахт (Ватикан маъмурияти) воситачи вазифасини бажарувчи «глобал ахлоқий ҳокимият», чунки у «холисдир ва низо томонларининг барчаси унга ишонч билдиради».
20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилди. Путин бунга жавобан, агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтди. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини айтди ва Зеленскийни «ўзига қулай бўлган исталган вақтда» Москвага келишга таклиф қилди.
Киев Зеленскийнинг Путин билан Москвада учрашишини имконсиз деб атади.
Изоҳ (0)