Chexiyada 29-aprel kuni bir necha ming kishi mamlakat prezidenti Milosh Zemanga qarshi namoyish uyushtirdi. Bu haqda Associated Press’ga tayanib, “Interfaks” xabar berdi.
Xabarga ko‘ra, namoyishchilar Praga markazidagi Vatslav maydoniga to‘plangan. Ular ijtimoiy masofani saqlab, niqob taqib olgan edi.
Ta’kidlanishicha, namoyishchilar Zemanni davlatga xiyonatda ayblamoqda va parlamentdan prezidentga tegishli ayblovlar qo‘yilishini talab qilmoqda. Ular prezidentning 2014-yilda Vrbetitsadagi o‘q-dorilar omboridagi portlashda “Rossiya agentlari”ning ishtiroki to‘g‘risida ma’lumot yo‘qligi haqidagi bayonotidan keyin ushbu harakatlarni boshladi.
Chexiyaning boshqa shaharlarida ham prezidentga qarshi namoyishlar bo‘lib o‘tdi.
25-aprel kuni Chexiya prezidenti Milosh Zeman xavfsizlik bo‘yicha axborot xizmatida (Chexiya kontrrazvedkasi) portlash paytida “rus agentlari” Vrbetitsa qishlog‘i hududiga tashrif buyurgani to‘g‘risida hech qanday dalil yo‘qligini aytdi. “Keling, jazavaga tushmasdan mulohaza bilan tergov natijalarini kutib, shundan keyingina qaror qabul qilaylik”, — deb ta’kidladi u.
Zemanning so‘zlariga ko‘ra, agar Rossiya agentlarining Vrbetitsadagi portlashda ishtiroki tasdiqlansa, Rossiya buning uchun javob berishi kerak bo‘ladi, masalan, Chexiya hukumati bir hafta oldin e’lon qilganidek, “Rosatom” kompaniyasi Chexiyadagi “Dukovani” AES uchun tenderda qatnashmaydi. Aksincha, agar shubhalar rad etilsa, demak, bu Chexiya Respublikasining ichki siyosiy hayoti uchun jiddiy oqibatlarga olib kelishi mumkin bo‘lgan maxsus xizmatlarning o‘yini bo‘lib chiqadi.
Rossiya—Chexiya munosabatlarining keskinlashuvi 17-aprel kuni Chexiya hukumati respublika sharqidagi Vrbetitsa qishlog‘idagi o‘q-dorilar omborlarida 2014-yilda sodir bo‘lgan portlashlar voqeasining yangi holatlariga aniqlik kiritish to‘g‘risida bayonot berganidan keyin boshlandi. Chexiya tomonining so‘zlariga ko‘ra, ushbu voqeada Rossiya maxsus xizmatlari ishtirok etgan. The Insider va Bellingcat agentliklari tomonidan o‘tkazilgan surishtiruvga ko‘ra, portlashlar operatsiyasiga Rossiya razvedka boshqarmasining 29155-sonli harbiy qism boshlig‘i, general Andrey Averyanov shaxsan rahbarlik qilgan. 17-aprel kuni Praga Rossiya elchixonasining 18 nafar xodimini chiqarib yuborishni e’lon qildi. Shuningdek, Chexiya Senati hukumatni Rossiya bilan do‘stlik shartnomasini bekor qilishga va Pragada faqat bir nafar rossiyalik diplomatni qoldirishga chaqirdi. Avvalroq Deputatlar palatasi (Chexiya parlamentining quyi palatasi) ham Chexiya hukumatini shunday choralar ko‘rishga chaqirgan edi.
Rossiya ayblovlarni bema’ni va asossiz deb atadi va Chexiyaning xatti-harakatlariga javob sifatida 20 nafar chexiyalik diplomatni mamlakatdan chiqarib yubordi.
Izoh (0)