Janubiy Koreyaning koronavirusga qarshi immunitetni oshiruvchi, achitilgan karam, tuz va achchiq qalampirdan tayyorlanadigan milliy taomining eksport hajmi 2021-yilning boshida rekord darajada o‘sdi. Bu haqda mamlakatning bojxona xizmati ma’lumotlariga tayanib Yonhap agentligi xabar berdi.
Agentlikning yozishicha, 2021-yilning yanvar oyidan mart oyigacha mamlakatda koreyscha kimchini yetkazib berish hajmi 46,57 million dollarni tashkil qildi (bu 2020-yil bilan taqqoslaganda 54,3 foizga ko‘proq). 2020-yilning birinchi choragida bu ko‘rsatkich 38,51 million dollarni tashkil qilgan edi.
“Bu tarixdagi eng katta choraklik ko‘rsatkich va u o‘tgan yilgi 42,08 million dollarlik rekordni yangiladi”, — deyiladi agentlik xabarida.
Birinchi chorakda 11,181 ming tonna kimchi chet elga eksport qilindi. Yaponiyaga jo‘natmalar miqdori 2020-yilgiga nisbatan 68 foizga o‘sib, 24,72 million dollarni, AQShda 80,6 foizga o‘sib, 8,46 million dollarni, Gonkongda 50,3 foizga o‘sib, 2,34 million dollarni tashkil etdi.
Mutaxassislar kimchi eksportining o‘sishini koronavirus pandemiyasi paytida immunitetni oshirishi mumkin bo‘lgan fermentlangan oziq-ovqat mahsulotlariga talabning ortishi bilan izohlamoqda.
2006-yilda ispaniyalik olimlar fermentlangan ovqatlarni ratsiondan kamaytirish yoki chiqarib tashlash immunitetga qanday ta’sir ko‘rsatishini o‘rgandi. Ular ko‘ngillilarga fermentlangan ovqatlarsiz diyetani taklif qildi. Ikki hafta o‘tgach, olimlar fermentlangan ovqatlarning yetishmasligi immunitetning pasayishiga olib kelishi mumkinligini aniqladi, bu esa o‘z navbatida infeksiyalarga javob berish qobiliyatiga ta’sir ko‘rsatadi. Keyin ular ko‘ngillilarga fermentlangan ovqatlarda mavjud bo‘lgan probiotiklarni berdi va natijada immunitet pasayishi to‘xtadi.
Ma’lumot uchun, Yaponiyada koronavirus pandemiyasi sharoitida yolg‘izlik vaziri lavozimi joriy etildi. Yaponiya bosh vaziri Yosixide Suganing ta’kidlashicha, zamonaviy dunyoda jamiyatdagi odamlar o‘rtasidagi aloqalar allaqachon zaiflashgan va koronavirus pandemiyasi ularning aloqalarini yanada cheklab qo‘ygan.
Shuningdek, Yaponiyada koronavirus fonida o‘z joniga qasd qilish holatlari o‘n yil ichida birinchi marta ko‘paygani ma’lum bo‘ldi.
Mavzuga doir:
- Dunyoda diabet bilan kasallanganlar 40 yil ichida to‘rt barobar ko‘paydi
- Toshkentda ayrim mahsulotlar Yevropa poytaxtlaridan ham qimmatroq ekani aniqlandi
- Kim Chen In Shimoliy Koreya yana 1990-yillardagi ocharchilik singari dahshatli davrga duch kelishini aytdi. Nima uchun Kim o‘z fuqarolarini qo‘rqitmoqda? Bunga Tramp va koronavirusning qanday aloqasi bor?
Izoh (0)