Rossiya Moskvadagi AQSh elchixonasining o‘n nafar xodimini persona non grata maqomidagi shaxslar deb e’lon qildi. Rossiya TIV mazkur notani AQSh elchisining o‘rinbosari Bart Gormanga topshirgan.
Diplomatlar 21-mayga qadar Rossiya hududidan chiqib ketishi shart. Tashqi ishlar vazirligi mazkur choraning Vashingtondagi elchixona va Nyu-Yorkdagi konsullikda rossiyalik diplomatlarga nisbatan qo‘llanilgan dushmanona siyosat, ularning asossiz ravishda persona non grata shaxslari deb e’lon qilinganiga javob sifatida qo‘llanilganini qayd etgan.
Shuningdek, Moskvaning navbatdagi chiqishida yaqin vaqt ichida AQSh tomonidan e’lon qilingan yangi sanksiyalarga nisbatan Rossiya TIV 16-aprelda e’lon qilgan bayonotda qayd etilgan keskin javob choralari amalga oshirilishi ham bayon qilingan.
20-aprelda AQShning Rossiyadagi elchisi Jon Sallivanning tez orada Vashingtonga qaytib ketishi ma’lum qilingandi. Mazkur qaror Rossiya prezidentining yordamchisi Yuriy Ushakovning elchiga AQSh poytaxtiga borish hamda yangi sanksiyalardan keyin yuzaga kelgan keskinlikni kamaytirish uchun jiddiy maslahatlashuvlar o‘tkazishni tavsiya qilganidan keyin chiqarilgan.
Rossiyaning Vashingtondagi elchisi Anatoliy Antonov mart oyi o‘rtalarida mamlakatga chaqirib olingan. Ushbu hodisa AQSh prezidenti Jo Baydenning jurnalistlarga bergan intervyusida hamkasbi Vladimir Putinni qotil deb hisoblash yoki hisoblamasligi haqidagi savolga “ha”, deb javob berganidan keyin sodir bo‘lgan.
Rossiyaning tashqi siyosatida Polsha, Bolgariya hamda Chexiya bilan munosabatlarda ham keskinlik kuzatilmoqda. Chexiya 18 nafar rossiyalik diplomatni qaytarib yuborishini bildirganidan keyin Rossiya ham 20 nafar chexiyalik diplomatni Moskvadan chiqarib yuborgan.
Shuningdek, Bolgariyada ikki nafar rossiyalik diplomat josuslikda gumon qilinib, Rossiyaga qaytarib yuborilgach, Rossiya ikki nafar bolgariyalik diplomatni mamlakatdan chiqarib yuborgan.
Izoh (0)