Жанубий Кореянинг коронавирусга қарши иммунитетни оширувчи, ачитилган карам, туз ва аччиқ қалампирдан тайёрланадиган миллий таомининг экспорт ҳажми 2021 йилнинг бошида рекорд даражада ўсди. Бу ҳақда мамлакатнинг божхона хизмати маълумотларига таяниб Yonhap агентлиги хабар берди.
Агентликнинг ёзишича, 2021 йилнинг январь ойидан март ойигача мамлакатда корейсча кимчини етказиб бериш ҳажми 46,57 миллион долларни ташкил қилди (бу 2020 йил билан таққослаганда 54,3 фоизга кўпроқ). 2020 йилнинг биринчи чорагида бу кўрсаткич 38,51 миллион долларни ташкил қилган эди.
«Бу тарихдаги энг катта чораклик кўрсаткич ва у ўтган йилги 42,08 миллион долларлик рекордни янгилади», — дейилади агентлик хабарида.
Биринчи чоракда 11,181 минг тонна кимчи чет элга экспорт қилинди. Японияга жўнатмалар миқдори 2020 йилгига нисбатан 68 фоизга ўсиб, 24,72 миллион долларни, АҚШда 80,6 фоизга ўсиб, 8,46 миллион долларни, Гонконгда 50,3 фоизга ўсиб, 2,34 миллион долларни ташкил этди.
Мутахассислар кимчи экспортининг ўсишини коронавирус пандемияси пайтида иммунитетни ошириши мумкин бўлган ферментланган озиқ-овқат маҳсулотларига талабнинг ортиши билан изоҳламоқда.
2006 йилда испаниялик олимлар ферментланган овқатларни рациондан камайтириш ёки чиқариб ташлаш иммунитетга қандай таъсир кўрсатишини ўрганди. Улар кўнгиллиларга ферментланган овқатларсиз диетани таклиф қилди. Икки ҳафта ўтгач, олимлар ферментланган овқатларнинг етишмаслиги иммунитетнинг пасайишига олиб келиши мумкинлигини аниқлади, бу эса ўз навбатида инфекцияларга жавоб бериш қобилиятига таъсир кўрсатади. Кейин улар кўнгиллиларга ферментланган овқатларда мавжуд бўлган пробиотикларни берди ва натижада иммунитет пасайиши тўхтади.
Маълумот учун, Японияда коронавирус пандемияси шароитида ёлғизлик вазири лавозими жорий этилди. Япония бош вазири Ёсихидэ Суганинг таъкидлашича, замонавий дунёда жамиятдаги одамлар ўртасидаги алоқалар аллақачон заифлашган ва коронавирус пандемияси уларнинг алоқаларини янада чеклаб қўйган.
Шунингдек, Японияда коронавирус фонида ўз жонига қасд қилиш ҳолатлари ўн йил ичида биринчи марта кўпайгани маълум бўлди.
Мавзуга доир:
- Дунёда диабет билан касалланганлар 40 йил ичида тўрт баробар кўпайди
- Тошкентда айрим маҳсулотлар Европа пойтахтларидан ҳам қимматроқ экани аниқланди
- Ким Чен Ин Шимолий Корея яна 1990 йиллардаги очарчилик сингари даҳшатли даврга дуч келишини айтди. Нима учун Ким ўз фуқароларини қўрқитмоқда? Бунга Трамп ва коронавируснинг қандай алоқаси бор?
Изоҳ (0)