Shimoliy Koreyada koronavirus tarqalishiga qarshi kurash uchun o‘rnatilgan qattiq cheklovlar sharoitida xalqaro gumanitar tashkilotlar, xususan Jahon oziq-ovqat dasturining so‘nggi xodimlari, mamlakatni tark etishga majbur bo‘ldi. Bu haqda Rossiya Tashqi ishlar vazirligining Xalqaro tashkilotlar departamenti direktori Pyotr Ilichyevga tayanib, “Kommersant” xabar berdi. Shimoliy Koreyada COVID-19 infeksiyasi bo‘yicha hali birorta holat rasmiy ravishda qayd etilmagan.
“COVID-19 pandemiyasi munosabati bilan Shimoliy Koreya hukumati chegaralarni yopdi. Xalqaro tashkilotlar o‘z kadrlarini almashtirish imkoniyatidan mahrum bo‘ldi, chet eldan gumanitar yordam yetkazib berish to‘sib qo‘yildi. 2020-yilning avgustidan beri Shimoliy Koreyaga bitta ham konteyner kiritilmagan”, — dedi Ilichyev.
Ta’minot yetishmasligi sababli, gumanitar tashkilotlarning vakillari mart oyida mamlakatni tark etishni boshladi. “Ta’minotlarning uzilishi, omborlarning bo‘shatilishi, yoqilg‘i yetkazib berilishidagi uzilishlar fonida gumanitar tashkilotlar faoliyatining kutilgan samaradorligi haqiqatan ham yo‘qqa chiqdi”, — deya qo‘shimcha qildi Rossiya TIV vakili. Uning so‘zlariga ko‘ra, mamlakatdagi qattiq cheklovlarning bekor qilinishiga hali beri umid yo‘q.
Aprel oyida KXDR yetakchisi Kim Chen In mamlakatda keng miqyosda ocharchilik bo‘lishi mumkinligini tan oldi. KXDRda vaziyatning yomonlashuvidagi muhim omillardan biri bu chegaralar yopilishi sababli Xitoy bilan savdo hajmining keskin pasayishi edi. Cheklovlar tufayli KXDRda allaqachon 12 ta elchixona yopilgan. Ularning xodimlari mamlakat hududini tark etgan. Rossiya elchixonasi xodimlari uyga motorsiz temiryo‘l vagonlari bilan qaytishga majbur bo‘lgan edi.
Izoh (0)