Toshkentda ayrim mahsulotlar Yevropa poytaxtlaridan ham qimmatroq ekani aniqlandi

Prognozlash va makroiqtisodiy tadqiqotlar instituti Price Warnings loyihasi doirasida Toshkent bozorlaridagi oziq-ovqat mahsulotlari narxlarini o‘rganib, boshqa mamlakatlar poytaxtlaridagi narxlar bilan solishtirdi, deya xabar bermoqda “Gazeta.uz”.

Ta’kidlanishicha, tadqiqot davomida Toshkent savdo nuqtalaridagi mahsulotlarning eng minimal narxlari olingan. Ma’lum bo‘lishicha, fevral oyidan buyon 28 xil mahsulotdan 20 tasining narxlarida o‘zgarishlar kuzatilgan, 17 xil mahsulot narxlari qimmatlagan.

Toshkentdagi narxlar bilan bir qatorda, 16 ta MDH va Yevropa davlatlari poytaxtlaridagi narxlar ham o‘rganilgan va solishtirilgan.

Solishtiruv natijalariga ko‘ra, Toshkentdagi ayrim mahsulotlarning narxlari biroz xavotirli ko‘rinmoqda.

Apelsinlar

Toshkent supermarketlarida apelsinlarning minimal narxi 1 kilogramm uchun 2,8 dollarga teng. Bu tahlil qilinayotgan shaharlar, jumladan Moskvadagi apelsinlarning minimal narxidan 4,3 baravarga yuqori. Ushbu ko‘rsatkich bo‘yicha Toshkent shahri Rim, London, Berlin shaharlarini ham ortda qoldirgan.

Limon

Toshkentdagi supermarketlarda 1 kilogramm limonning minimal narxi 2,8 dollarni tashkil etadi, bu tahlil qilinayotgan mamlakatlar uchun o‘rtacha ko‘rsatkichdan 69,4 foizga, shu jumladan, Anqaradagi limonlarning minimal narxidan 3,3 baravar yuqori. Bu yerda ham narxlar Yevropa megapolislaridagi narxlardan ancha baland.

Banan

Toshkentdagi supermarketlarda 1 kilogramm bananning minimal narxi 2,1 dollarni tashkil etadi, bu tahlil qilinayotgan mamlakatlar uchun o‘rtacha narxdan 55,7 foizga yuqori va Moskvadagi banan uchun qayd etilgan minimal narxdan 2,7 baravar yuqori. Banan narxlari bo‘yicha ham Toshkent MDH poytaxtlarini hamda bir qator Yevropa markazlarini ortda qoldirgan.

Qadoqlangan sut

Toshkent shahridagi supermarketlarda pasterizatsiya qilingan sutning minimal narxi 1 litr uchun 0,82 dollarni tashkil etadi, bu tahlil qilinayotgan mamlakatlar uchun o‘rtacha 18,8 foizga va Bishkekdagi eng minimal narxdan 93 foizga yuqori. Qadoqlangan sutning yuqori narxlarining asosiy sababi bozordagi rivojlanmagan raqobatdir, deyiladi institut tahlilida.

Margarin

Toshkent shahridagi supermarketlarda 1 kilogramm margarinning minimal narxi 2,2 dollarni tashkil etadi, bu tahlil qilinayotgan mamlakatlar uchun o‘rtacha narxdan 20,2 foizga va Bishkekdagi eng minimal qayd etilgan narxdan 85,6 foizga yuqori.

Kartoshka

Toshkent shahridagi supermarketlarda kartoshkaning minimal narxi 1 kilogramm uchun 0,46 dollarni tashkil etadi, bu Anqaradagi kartoshka uchun belgilangan minimal narxdan 2,3 baravar yuqori.

Mandarinlar

Toshkentdagi supermarketlarda 1 kilogramm mandarinning minimal narxi 1,7 dollarni tashkil etadi, bu Moskvadagi mandarinlar uchun belgilangan eng past narxdan 87,9 foizga yuqori.

O‘simlik yog‘i

Toshkent shahridagi supermarketlarda o‘simlik (kungaboqar) yog‘ining minimal narxi litri uchun 1,7 dollarni tashkil etadi, bu tahlil qilinayotgan mamlakatlar uchun o‘rtacha narxdan 6,7 foizga yuqori va Bishkek shahridagi kungaboqar yog‘i uchun belgilangan minimal narxdan 2 baravar yuqori.

Makaron

Toshkent shahridagi supermarketlarda makaron mahsulotlarining minimal narxi 1 kilogramm uchun 0,83 dollarni tashkil etadi, bu Minskdagi makaron mahsulotlari uchun belgilangan minimal narxdan 83,4 foizga yuqori.

Mol go‘shti

Toshkent shahridagi supermarketlarda 1 kilogramm mol go‘shtining minimal narxi 5,2 dollarni tashkil etadi, bu Minskdagi mol go‘shti uchun belgilangan eng past narxdan 56,5 foizga yuqori.

Bundan avval O‘zbekistonda eng qimmat va eng arzon o‘simlik yog‘i qayerda sotilayotgani ma’lum qilingani, O‘zbekistonda inflyatsiya darajasi ketma-ket uch oydan buyon 1 foizdan oshmayotgani hamda O‘zbekiston aholisining daromadi 2020-yilda keskin kamaygani haqida xabar berilgandi.