Hindistondagi epidemiologik vaziyat yomonlashishda davom etmoqda: to‘rt kun ichida mamlakatda bir million kishida COVID-19 aniqlandi. Bu haqda Times of India nashriga tayanib, “Interfaks” xabar berdi.
Bu koronavirusning mamlakatda tarqalish darajasi bo‘yicha yangi rekord. Avvalroq, olti kun ichida Hindistonda bir million yangi kasallanish holati qayd etilgandi.
Xabarga ko‘ra, so‘nggi 24 soat ichida Hindiston hukumati COVID-19’ga chalinish bo‘yicha 295 mingdan ortiq yangi holatni ro‘yxatdan o‘tkazdi. Bu pandemiya boshlanganidan beri mamlakatda kunlik infeksiyalanish sonining yuqoriligi bo‘yicha ikkinchi va 200 mingdan ortiq yangi holat aniqlangan yettinchi kun. 21-aprel kuni kasallikdan vafot etganlar soni ikki mingdan oshdi.
Shunga qaramay, Hindiston bosh vaziri Narendra Modi qat’iy lokdaun o‘rnatishga qarshi.
“Men davlatlarni lokdaun o‘rnatishni so‘nggi chora sifatida ko‘rishga chaqiraman. Ular lokdaungacha olib bormaslik choralariga chin dildan yondashishga va diqqatini infeksiyaning mikrozonalariga qaratishga harakat qilishi kerak”, — dedi Modi.
Ma’lum bo‘lishicha, kasallanganlar sonining ortishi fonida Hindiston kasalxonalarining reanimatsiya bo‘limlarida yotoq va tibbiy kislorod yetishmayapti. Dehli bosh vaziri Arvind Kejrivalning aytishicha, agar yangi yuqtirishlar soni kamaymasa, sog‘liqni saqlash tizimi qulashi mumkin.
Hindistonda pandemiya boshlanganidan buyon 15 milliondan ortiq odam koronavirus bilan kasallangan, 180 mingdan ortig‘i vafot etgan.
12-aprel kuni Hindistonda koronavirusga qarshi Rossiyaning “Sputnik V” vaksinasidan favqulodda holatlarda foydalanishga ruxsat berildi.
Izoh (0)