Qozog‘istonda bir yil ichida tug‘ilgan bolalar soni bo‘yicha rekord qayd etildi. Bu haqda Tengrinews xabar berdi.
Tahlilchilarning ma’lumotlariga ko‘ra, 2020-yilda rekord darajada – 460 mingga yaqin bola dunyoga keldi. Ta’kidlanishicha, avvalgi ko‘rsatkichlar “400 ming atrofida barqaror turgan”.
Shu bilan birga, mutaxassislar bolalar ta’limi muammosini ham ko‘tardi.
“Olti-yetti yildan keyin bu bolalarni o‘qitish uchun maktablar kerak bo‘ladi. Davlat-xususiy sheriklikni, investorlarni va quruvchilarni rag‘batlantirish kabi barcha ehtimoliy mexanizmlar jalb qilinmasa, Qozog‘iston ta’lim tizimining jiddiy muammolarga duch kelish xavfi bor.
Demografik va migratsiya jarayonlarini hisobga olgan holda, shaharlarda o‘rta ta’limdagi infratuzilmaning yetishmasligi bilan bog‘liq vaziyat yomonlashishi mumkin. 2025-yilga kelib maktablarda joy taqchilligi taxminan 670 mingni tashkil etadi”, — deb xulosa berdi mutaxassislar.
Qozog‘iston Ta’lim va fan vazirligining ma’lumotlariga ko‘ra, bugungi kunda mamlakatda jami 3,4 million o‘quvchiga ta’lim beruvchi 7429 ta maktab faoliyat yuritadi. Ularning 137 tasi uch smenali tartibda ishlasa, yana 34 tasi avariyaviy holatda, deyiladi bosh vazirning rasmiy manbasida.
“Primeminister.kz” ma’lumotlariga ko‘ra, 2020-yilning oxiriga kelib mamlakatning barcha 17 ta mintaqasida o‘quvchi o‘rinlarining umumiy taqchilligi 168 mingdan oshdi. Shu bilan birga, “Atameken” Milliy tadbirkorlar palatasining Inson kapitalini rivojlantirish departamenti direktori Lazzat Shonayevaning ta’kidlashicha, 2021-yilda maktabdagi o‘rinlarning yetishmasligi 264,8 mingni tashkil etyapti.
Mutaxassislar fikriga ko‘ra, raqamlar mamlakatdagi maktab yetishmasligi muammosining me’yoridan ortiqligiga ishora qilmoqda.
Tojikistonda esa 2020-yilda vafot etganlar soni 2019-yilga nisbatan 8,6 mingga ko‘paygan. Vazirlik ma’lumotlariga ko‘ra, mamlakatda 2020-yilda 41 693 ta, 2019-yilda esa 33 050 ta o‘lim holati qayd etilgan. O‘sish taxminan 13,7 foizni tashkil etgan.
Shuningdek, dunyoda egizaklar tug‘ilishi darajasi eng yuqori cho‘qqiga chiqqani haqida xabar berildi. Tadqiqot natijalariga ko‘ra, dunyo bo‘yicha egizaklarning tug‘ilish miqdori har 1000 ta tug‘ilishga nisbatan o‘rtacha 9 tadan 12 tagacha oshgan, lekin bu ko‘rsatkich har bir davlatda bir-biridan farq qiladi. Eng katta o‘sish Shimoliy Amerikada (71 foiz), Yevropada (60 foiz), va Osiyoda (32 foiz) kuzatilgan.
Izoh (0)