Қозоғистонда бир йил ичида туғилган болалар сони бўйича рекорд қайд этилди. Бу ҳақда Tengrinews хабар берди.
Таҳлилчиларнинг маълумотларига кўра, 2020 йилда рекорд даражада – 460 мингга яқин бола дунёга келди. Таъкидланишича, аввалги кўрсаткичлар «400 минг атрофида барқарор турган».
Шу билан бирга, мутахассислар болалар таълими муаммосини ҳам кўтарди.
«Олти-етти йилдан кейин бу болаларни ўқитиш учун мактаблар керак бўлади. Давлат-хусусий шерикликни, инвесторларни ва қурувчиларни рағбатлантириш каби барча эҳтимолий механизмлар жалб қилинмаса, Қозоғистон таълим тизимининг жиддий муаммоларга дуч келиш хавфи бор.
Демографик ва миграция жараёнларини ҳисобга олган ҳолда, шаҳарларда ўрта таълимдаги инфратузилманинг етишмаслиги билан боғлиқ вазият ёмонлашиши мумкин. 2025 йилга келиб мактабларда жой тақчиллиги тахминан 670 мингни ташкил этади», — деб хулоса берди мутахассислар.
Қозоғистон Таълим ва фан вазирлигининг маълумотларига кўра, бугунги кунда мамлакатда жами 3,4 миллион ўқувчига таълим берувчи 7429 та мактаб фаолият юритади. Уларнинг 137 таси уч сменали тартибда ишласа, яна 34 таси авариявий ҳолатда, дейилади бош вазирнинг расмий манбасида.
«Primeminister.kz» маълумотларига кўра, 2020 йилнинг охирига келиб мамлакатнинг барча 17 та минтақасида ўқувчи ўринларининг умумий тақчиллиги 168 мингдан ошди. Шу билан бирга, «Атамекен» Миллий тадбиркорлар палатасининг Инсон капиталини ривожлантириш департаменти директори Лаззат Шонаеванинг таъкидлашича, 2021 йилда мактабдаги ўринларнинг етишмаслиги 264,8 мингни ташкил этяпти.
Мутахассислар фикрига кўра, рақамлар мамлакатдаги мактаб етишмаслиги муаммосининг меъёридан ортиқлигига ишора қилмоқда.
Тожикистонда эса 2020 йилда вафот этганлар сони 2019 йилга нисбатан 8,6 мингга кўпайган. Вазирлик маълумотларига кўра, мамлакатда 2020 йилда 41 693 та, 2019 йилда эса 33 050 та ўлим ҳолати қайд этилган. Ўсиш тахминан 13,7 фоизни ташкил этган.
Шунингдек, дунёда эгизаклар туғилиши даражаси энг юқори чўққига чиққани ҳақида хабар берилди. Тадқиқот натижаларига кўра, дунё бўйича эгизакларнинг туғилиш миқдори ҳар 1000 та туғилишга нисбатан ўртача 9 тадан 12 тагача ошган, лекин бу кўрсаткич ҳар бир давлатда бир-биридан фарқ қилади. Энг катта ўсиш Шимолий Америкада (71 фоиз), Европада (60 фоиз), ва Осиёда (32 фоиз) кузатилган.
Изоҳ (0)